Չգիտեմ հետագայում այլընտրանքային Երևանը որտեղ է լինելու․ Սեյրան Օհանյան

«Հայաստան» խմբակցությունն այսօր խորհրդարանական լսումներ է նախաձեռնել Հայաստանի և Ադրբեջանի միջև սահմանազատման և սահմանագծման հիմնախնդիրների վերաբերյալ:Նիստին մասնակցում են ընդդիմադիր պատգամավորներ, արտախորհրդարանական ուժերի ներկայացուցիչներ, զինվորականներ, հասարակական և մտավորական գործիչներ, փորձագետներ:

Հիմնական ելույթի իր խոսքում «Հայաստան» խմբակցության ղեկավար Սեյրան Օհանյանն անդրադարձավ սահմանազատման ու սահմանագծման գործընթացին, դրանից բխող  հետևանքներին  և այլն։

«Խորհուրդ կտայի այս պահին  մանրակրկիտ ուսումնասիրել ՄԻՊ զեկույցը , որտեղ մանրամասն նշված են այն գյուղերը , բնակավայրերը, արոտավայրերը, կենսական նշանակության օբյեկտները, որոնք հայտնվել են Ադրբեջանի ազդեցության տակ։ ՀՀ իշխանությունները փոխարեն արժանապատիվ  պաշտպանության և դրա համար  համախմբման պահանջարկ ձևավորեն,   կեղծ օրակարգով  «Խաղաղութայն դարաշրջանի»  պահանջարկ են ձևավորում, և փոխարեն ՀՀ շահերից  բխող միջոցառումներ իրականացնեն, անհասկանալի է ում շահերն են  պաշտպանում՝  դիվանագիտական և բանակցային  ռեսուրսի թերի գործադրումով  և ռազմավարական գործընկերնի հետ ոչ սկզբունքային, անհետևողական հարաբերություններ հաստատելով»,-ասաց Սեյրան Օհանյանը։

 « Մեր երկրի իշխանությունները կատարում են թուրք-ադրբեջանական թելադրանքը, դեռ ավելին,  սահմնանում համապատասխան պաշտպանություն չիրականացնելով  մեծ ոգևորությամբ են խոսում  այլընտրանքային ճանապարհների մասին, գյուղերի մասին, որտեղ  բնակչության համապատասխան թվաքանակ գոյություն ունի , չհասկանալով, որ  հետագայում ստիպված են լինելու այլընտրանքային գյուղեր կառուցել ․  այնուամենայնիվ  չգիտեմ այլընտրանքային Երևանը որտեղ է լինելու»,-նշեց Սեյրան Օհանյանը։

Սեյրան Օհանմյանը նաև հատկանշեց փաստը, որ  բարձրագույն ղեկավարության ներկայացուցիչներից որևէ մեկն այդպես էլ բացատրություն չտվեց, թե ինչու եղավ մեկօրյա պատերազմը, ինչ հաջորդեց և նախորդեց դրան․

 «Փաստն այն է, որ ունեցանք զոհեր, վիրավորներ, գերիներ, իսկ Ադրբեջանը  մտավ ՀՀ ինքնիշխան տարածք , այսինքն տեղի ունեցավ սահմանագծում՝  արյունով»,-ասաց Սեյրան Օհանյանը։  

Ամփոփելով  խոսքը Սեյրան Օհանյանն ընդգծեց, որ  ՀՀ-ը չունի  միջ․ իրավական  պարտավորվածություն ՝ հիմք ընդունելու որևէ քարտեզով  սահմանագծման ու սահմանազատման գործընթաց։