«Իսկանդերի» 10 տոկոսով կրակելը 10 տոկոսով հղի լինելու պես մի բան է. Կարեն Վրթանեսյան

«Իսկանդերի» 10 տոկոսով կրակելը 10 տոկոսով հղի լինելու պես մի բան է: Yerevan.Today-ի հետ զրույցում ասաց ռազմական փորձագետ Կարեն Վրթանեսյանը՝ անդրադառնալով Նիկոլ Փաշինյանի այն հայտարարությանը, որտեղ ասում է. «Այդ ակնարկը, գուցե, հասցեագրված է նաև ինձ, բայց կարծում եմ՝ մերժվածը պետք է, որ բազմաթիվ հարցերի պատասխան իմանա և չտա հարցեր, որոնց պատասխանն ինքը գիտի: Իսկ գուցե պատասխանե՞ն՝ ինչո՞ւ կրակած «Իսկանդեր»-ը չի պայթել կամ պայթել է, օրինակ՝ 10 տոկոսով»:

Կարեն Վրթանեսյանի խոսքով՝ ոչ մի հիմնավորում ու տրամաբանություն չկա Նիկոլ Փաշինյանի ասածի մեջ. «Իր ասածն իրականությանը չի համապատասխանում, առավել ևս, որ վերջում ինքն էլ ասաց, որ չգիտի: Հարցն այն մասին էր, թե ինչո՞ւ չեն կրակել 4-5-րդ օրը, իսկ նա պատասխանեց՝ ասելով, որ մենք չենք կրակել, որվհետև 40-րդ օրը ենթադրաբար ինչ-որ խնդիր են ունեցել, այսինքն 4-5-րդ օրը չօգտագործելը հիմնավորում է 40-րդ օրվա խնդիրներով: Ինչ-որ աբսուրդ է, այստեղ պետք չէ ինչ-որ տրամաբանություն փնտրել, ուղղակի նա նման է այն խորամանկ գյուղացուն, որ ոտքի վրա փորձում է խաբել ու անորակ ապրանքը մեկին ծախել, հետո ինչ ուզում է լինի. այդ ոճի ինչ-որ բան էր»:

Ինչ վերաբերում է այն պնդումներին, թե «Իսկանդերը» չի փորձարկվել մինչև պատերազմը և արդարացված է Փաշինյանի հայտարարությունը, թե համակարգը կարող էր կրակել 10 տոկոսով, Կարեն Վրթանեսյանն ասաց. «Նախ «Իսկանդերը» փորձարկվել է 90-ականներին՝ Ռուսաստանում, մինչև 2004 թվական պետական փորձարկումներ էին ընթանում, «Իսկանդերը» կրակվել է Ռուսաստանում տարբեր պոլիգոններում, դա բազմիցս արձանագրված, վավերագրած փաստ է: Ես համոզված եմ, որ դեռ մինչև գնումները հայկական կողմի ներկայացուցիչները որոշ փորձարկումների կամ զորավարժությունների ժամանակ օգտագործմանը ներկա են եղել: «Իսկանդերն» այնքան թանկ զենք է, որ ձեռքի հետ կրակելու համար չէ, որ բերես ասես մի հատ էլ մենք կրակենք: Բացի դա, դա Հայսատանում էլ կարելի էր կիրառել, մեր մոտ ունեցած տարբերակի 300 կիլոմետր է առավելագույն հեռավորությունը, ոչ մի բան չէր խանգարում կիրառել 200 մետր հեռավորության վրա: 

Ի դեպ, «Իսկանդերը» կիրառվել է նաև «Սիրիայում» մարտական պայմաններում, գոնե խոսակցություններ կային այդպիսի: Բայց այդ ամենը մի կողմ՝ ով ասաց, որ «Իսկանդերը» չի պայթել, Նիկոլ Փաշինյանի ասածում չկա, որ չի փայթել, ինքն ասում է՝ կամ չի պայթել, կամ 10 տոկոսով է պայթել»:

Կարեն Վրթանեսյանը նաև ընդգծում է. «Արդեն շատ սովորական է դարձել, որ պետության ղեկավարի երեք ասածից երկուսը սուտ են, մեկն էլ մանիպուլյացիա է: Ես վստահ պնդում եմ, որ Նիկոլ Փաշինյանը հերթական անգամ ստում է, որի հետևանքներն արդեն տեսնում ենք ռուսական լրատվամիջոցներում, ադրբեջանցիները, ուկրաինացիները ոգևորված դա տարածում են, մեկնաբանում են և այլն: Իսկ ես նաև հիշեցնեմ, որ Հայաստանն առաջին երկիրն էր, որտեղ Ռուսաստանն արտահանեց «Իսկանդեր», շատ երկրներ էին ուզում, բայց միայն Հայաստանին տրվեց՝ անձամբ Սերժ Սարգսյանի ջանքերի շնորհիվ»: