Քաղաքական շոուներ են․ Նարեկ Մանթաշյանը՝ իր բնակարանում «ժամանակավրեպ» խուզարկության մասին

Ընդդիմադիր գործիչ Նարեկ Մանթաշյանը ֆեյսբուքյան էջում գրել էր, որ իր բնակարանում խուզարկություն է կատարվել։

Խուզարկության հետ կապված մանրամասները ճշտելու համար Yerevan.Today-ը կապ հաստատեց Նարեկ Մանթաշյանի հետ։ 

«Խուզարկությունը կատարվել է այն գործով, որով որ մեղադրվում եմ, և դատարանը կալանքի միջնորդությունը մերժել է։ ԱԱԾ քննչական  դեպարտամենտը դիմել է դատարան, ստացել են դատարանի որոշումը, խուզարկությունը կատարել է ոստիկանությունը։

Փնտրել են նոյեմբերի 10-ի գիշերը կառավարությունում տեղի ունեցած իրադարձությունների հետ կապված իրեր, փաստաթղթեր, համակարգիչ։ Ոչինչ չեն գտել և չեն առգրավել»։

Նարեկ Մանթաշյանը նշեց, որ այդ գործողություններն առնվազն ժամանակավրեպ է գնահատում, որովհետև գործի շրջանակներում ձերբակալվել էր և 3 օր անցկացրել ՁՊՎ-ում։

«Նույնիսկ ողջամտությունը հուշում է, որ եթե ես նույնիսկ թաքցնելու բան ունենայի, հիմա տանը չէի պահի, որովհետև արդեն բավականին ժամանակ է անցել։ Իսկ ինչ վերաբերում է գործի բուն էությանը, դատարանը կալանքիս միջնորդությունը մերժելու հիմքում դրել է նաև քրեական գործով որպես մեղադրյալ ներգրավվելուս ողջամիտ կասկածի բացակայությունը, այսինքն՝ նույնիսկ եթե իբր ես, այնտեղ գտնվելով, հանցագործություն եմ կատարել, ինչը որակվել է այդպես, դատարանը նույնիսկ դրան է տվել իր գնահատականը՝ շեշտելով, որ ողջամիտ կասկածի բացակայություն կա, այսինքն՝ նույնիսկ հանցագործության կասկած չի կարող լինել»։

«Հիմա հերթական քաղաքական շոուներն են»,- եզրափակեց Նարեկ  Մանթաշյանը