Երբ Արցախում թեժ մարտեր են, սկիզբ է դրվել տարօրինակ ժամանակավրեպ մի քննարկման․ Մարուքյան

Վերջին օրերին, երբ Արցախում շարունակվում են թեժ մարտերը, երբ բոլորը կենտրոնացրել են իրենց ջանքերը այս բարդ իրադրության հայանպաստ հանգուցալուծման եւ հաղթանակի համար, սկիզբ է դրվել տարօրինակ մի քննարկման, որն առնվազն ժամանակավրեպ է։ Այս մասին facebook-ի իր էջում գրել է ԱԺ «Լուսավոր Հայաստան» խմբակցության ղեկավար Էդմոն Մարուքյանը:

Նա, մասնավորապես, նշել է. «Օրերս Հայկական միասնական տեղեկատվական կենտրոնը «Հնարավո՞ր էր արդյոք խուսափել պատերազմից» թեմայով քննարկում նախաձեռնեց։ Երեկ «Հայկական ժամանակ» օրաթերթում հրապարակվեց խմբագրական՝ «Կարո՞ղ էինք արդյոք խուսափել պատերազմից» վերնագրով։ Նույնաբովանդակ քննարկումներ են հարուցվել բազմաթիվ այլ հարթակներում, որտեղ մասնակից կողմերը հիմնավորում են պատերազմի անխուսափելի լինելը։

Եթե սա զուտ քաղաքական նպատակներ ունեցող եւ միակողմանի պրոպագանդա չէ, ապա ինչպե՞ս կարող է լինել պատերազմից խուսափելու հնարավորությունները ներկայացնող տեսակետ կամ բանավեճ եթե այդ տեսակետը անհամատեղելի է ռազմական դրության շրջանակներում սահմանված խոսքի ազատության իրավական սահմանափակումների հետ։

Եթե դա իրական քննարկում է, այլ ոչ միակողմանի իշխանական պրոպագանդա, ապա ո՞վ պետք է իրեն վերապահի պատերազմի ծանր օրերին հակադրվել այդ թեզին եւ փորձել հակառակն ապացուցել։

Այդ հարցադրումը պետք է ստանա իր պատասխանը, բայց ոչ այսօր եւ ոչ հիմա։ Պատերազմի ժամանակ չեն արդարանում, չեն նախաձեռնում քննարկումներ, որոնք բանակի մարտունակության կամ թիկունքի ամրության հետ կապ չունեն։

Հորդորում եմ դադարեցնել այս քննարկումները՝ արդարացումները պահելով խաղաղ ժամանակների համար, որոնք Աստծո կամքով շուտ կգան»։