Ժողովուրդն իրենց այստեղից վռնդելու է. Փաշինյանը՝ Ծառուկյանի գործի և ԲՀԿ-ի մասին

Վարչապետ Նիկոլ Փաշինյանը ԱԺ-ում հիշեցրեց, որ նախկինում բազմիցս ասել է, որ կոռուպցիոն գործերով ՀՀ քննչական մարմինները էֆեկտիվ չեն գործում, ու վերջին պաշտոնանկությունների հարցում դեր է ունեցել նաև այդ գործոնը:

«Կարող եմ ասել, որ կորոնավիրուսի հետ կապված պաշտոնանկությունների մասին որ ասում էի, դրանք եղել են  ինչ-որ առումով կուլմինացիա, բայց այդ պաշտոնանկությունների մեջ նաեւ որոշակի դեր է ունեցել կոռուպցիայի դեմ պայքարի այս պրոցեսը: 

Ես քննչական որոշ մարմիններում ես զգացել եմ, որ արհեստականորեն կոռուպցիոն գործերը առաջ չեն գնում: Ուզում եմ հիշեցնել, որ այդ հայտարարությունը (նկատի ունի Գագիկ Ծառուկյանի հունիսի 5-ի հայտնի հայտարարությունը-խմբ) հնչել է այն ժամանակ, երբ ԱԱԾ-ում արդեն մեծ փոփոխություններ էին տեղի ունեցել, փոխվել էր քննչական վարչության ղեկավարը եւ այսօրվա տնօրենը նշանակվել էր ԱԱԾ տնօրենի տեղակալ:

Այս ընթացքում իրավապահ համակարգերում մենք ունեցել ենք մեծ պրոբլեմ: Առավոտը ժամը 7-ին քննիչները գնում էին խուզարկության, տեսնում էին տանտիկինը մակիաժով, երեկոյան զգեստով դուռը բացեց: Իշխանությունը նախկինում այս քրեական գործերը օգտագործել է, որպեսզի այս քաղաքական ուժերին պահի կոնտրոլի տակ, որովհետև լեգիտիմության խնդիր է ունեցել: Իսկ մեր իշխանությունն այդպիսի խնդիր չունի: Մեզ պետք չէ քրեական գործերը դարձնել քաղաքական առևտրի առարկա, որ երկու հայտարարություն պակաս անեն կամ խոսելու ձևն ընտրեն: Մենք իրենց խոսելու ձևը կսովորեցնենք: Իրենք այստեղ չեն էլ խոսի, որովհետև ժողովուրդն իրենց այստեղից վռնդելու է ընդհանրապես» ,- ասաց Փաշինյանը:

Ինչ վերաբերում է Գագիկ Ծառուկյանի քրեական գործերին, վարչապետը հայտարարեց, որ քննվում է Երրորդ հանրապետության պատմության ամենակարևոր գործերից մեկը, որով բացահայտվելու է «ժողովրդի կամքի վրա բռնանալու ինստիտուտը»: