Նոր ձերբակալությունները ռեժիմի համար դարձել են անհրաժեշտություն․ Ենոքյան

Քաղաքագետ, «Մեդիա պաշտպան» նախաձեռնության ղեկավար Աղասի Ենոքյանը ֆեյսբուքյան իր էջում գրում է.

«Շուտով կսկսվեն զանգվածային ձերբակալություններ։ Այս ընթացքում դրա համար ստեղծվել են բոլոր հիմքերը։ Ատելության խոսքի քրեականացումը ստեղծել է մի իրավիճակ, երբ սևուսպիտակի բևեռացված քաղաքական կյանքում ցանկացած ակտիվ հասարակական դիրքորոշում ունեցողի նկատմամբ կարող են քրեական գործ հարուցել։ Շատ ընդդիմախոսների նկատմամբ արդեն իսկ հարուցվել են քրեական գործեր։ Գաղտնալսման և գեոլակացիայի մասին օրենքը իշխանությանը ոչ հաճո գործիչներին արագ հայտնաբերելու հնարավորություն է ստեղծում, էլ չասենք, որ առավել ակտիվների նկատմամբ գաղտնի վերահսկողությունը՝ «նարուժկան», վաղուց է սահմանվել։ Ուժային կառույցներին Նիկոլ Փաշինյանը լավ թափ է տվել ու բարոյազերծել, և նրանք ավելի պատրաստ են կատարելու նրա կամքը։

Նոր ձերբակալությունների շարքը Նիկոլ Փաշինյանի ռեժիմի գործունեության համար դարձել է անհրաժեշտություն։ Կորոնավիրուսը հանրության, նույնիսկ՝ պողոսների համար ակնհայտ դարձրեց, որ իշխանություններն անգործունյա են, անընդունակ որևէ հարց լուծելու։ Ձերբակալությունները կապահովեն գործունեության պատրանք։ Քոչարյանին կալանավորված պահելն այլևս չի ապահովում այդ պատրանքը, սակայն նրան ազատելու բազմաթիվ միջնորդությունները, այդ թվում և վերջինը՝ համաճարակի պայմաններում 4 նախկին վարչապետներին մերժելը ցույց է տալիս, որ ռեժիմը գնում է հետագա կոշտացումների։

Նիկոլ Փաշինյանի ներկայությամբ վերջին ձեռնամարտն Ազգային պողովում լուրջ բացահայտում էր, որ սեփական թիմը նույնպես չի հարգում նրան։ Բազմաթիվ են խոսակցությունները թիմում եղած տարաձայությունների, ֆրակցիաների, բաժանումների մասին։ Ձերբակալությունների նոր ալիքով Նիկոլ Փաշինյանը իր թիմին կփորձի ցույց տալ, որ ինքը տիրապետում է իրավիճակին, դեռևս «կռուտոյ» է։

Եվ ամենակարևորը՝ Լավրովին այդպես էլ հոդաբաշխ պատասխան չտրվեց, Հայաստանում Ղարաբաղը փուլային տարբերակով հանձնելու մասին կասկածներն արդեն վեր են ածվում համոզմունքի։ Կոռուպցիոն սկանդալները Նիկոլ Փաշինյանի անձի շուրջ թավալգլոր ահագնանում են։ Զանգվածային ձերբակալությունները թե նոր քննարկումների թեմաներ կառաջացնեն, թե դեռևս դրսում մնացած ընդդիմախոսներին կզբաղեցնեն ավելի կարևոր՝ իրենց ընկերներին ազատելու գործով։

Այժմ անհրաժեշտ են իրական ձերբակալություններ՝ ոչ թե ռեկետով փող շորթելու,այլ ռեժիմը պահելու համար»։