Վարչապետը՝ մի ամբողջ գյուղ մեկուսացնելու մասին

Ընդհանուր առմամբ համաճարակի մեր կորը կառավարելիության տիրույթում է, բայց եթե մենք շարունակենք մեր այն վերաբերմունքը, որ շատ հաճախ տեսնում ենք մեր իրականության մեջ, կարող ենք իսկապես ունենալ համաճարակի նոր բռնկում: Այս մասին ապրիլի 16-ին, կառավարության նիստում նշեց ՀՀ վարչապետ Նիկոլ Փաշինյանը:

Նա ներկայացրեց Արարատի մարզի Նորաշեն գյուղում տեղի ունեցած դեպքի մնանրամասները. «Մեկուսացման մեջ գտնվող քաղաքացիներից մեկի ընտանիքում դժբախտություն է տեղի ունեցել և դիմումի հիման վրա  մեկուսացման մեջ գտնվող անձը ուղեկցվել է թաղման արարողության: Իհարկե նախապես զգուշացվել է, որ պետք է պահել հեռավորություն և որոշակի կանոններ պահպանել: Նա եղել է մասնագետի և ոստիանության ուղեկցությամբ, բայց հասկանալի է, որ հուզումնալից պահ է եղել, եւ նրանք այնուամենայնիվ, ի հեճուկս, խնդրանքների, չեն պահել պայմանները և հարազատների հետ գրկախառնվել են: Երկու օր անց մեկուսացման մեջ գտնվող անձի մոտ թեստը դրական արդյունք է ունեցել, հաստատվել է վարակի դեպք: Սրա հետ կապված պարետատունը որոշում է կայացրել Նորաշեն համայնքը ամբողջությամբ մեկուսացնել: Հասկանալի է, որ պարետատունը ճիշտ որոշում է կայացրել, որ քաղաքացուն ուղեկցի հոգեհանգստի, բայց պարզ է, որ ոստիկանությունը չի կարող ամեն բան հսկողության տակ պահել: Քաղաքացիներն իրենք պետք է հասկանան, որ այս իրավիճակը չափազանց լուրջ է: Հիմա կարող են լիենլ վարակված հարազատներ, Աստված չանի, մահվան ելքով»,- հայտարարեց վարչապետը: