03 04 2020

Պետական մարմինները պետք է առավել շատ կիրառեն ազատությունից զրկման այլընտրանքային միջոցները. ՄԻՊ. Panorama.am

Պետական մարմինները պետք է առավել շատ կիրառեն ազատությունից զրկման այլընտրանքային միջոցները. ՄԻՊ. Panorama.am

Վարդաշեն ՔԿՀ-ի աշխատակիցների շրջանում կորոնավիրուսով վարակակիրների առկայության հաստատումից հետո լուրջ մտահոգություններ կան կալանավայրերում պահվողների՝ հատկապես առողջական խնդիրներ ունեցողների ու տարեցների վերաբերյալ, որոնք ռիսկի խմբում են։

Ի՞նչ է կարծում Հայաստանի Մարդու իրավունքների պաշտպան Արման Թաթոյանը՝ կա՞ն նրանց առողջական անվտանգությունը ապահովող միջոցառումներ, թե՞ այնուամենայնիվ ճիշտ կլիներ նրանց ազատել՝ գրավի դիմաց, տնային կալանքով կամ մեկուսացման պայմաններով։
Panorama.am-ի հարցին ի պատասխան ՄԻՊ-ն արձագանքեց.

«Կորոնավիրուսի վարակի հետ կապված (COVID-19) ԵԽ Խոշտանգումների կանխարգելման կոմիտեի կայքում օրերս հրապարակվել է ազատությունից զրկված անձանց նկատմամբ վերաբերմունքին առնչվող հրատապ սկզբունքներ հայերենով  և ուղարկվել պետական իրավասու մարմիններին իրենց աշխատանքում կիրառելու համար։

ԵԽ Խոշտանգումների կանխարգելման կոմիտեն նշել է, որ պետական մարմինները պետք է առավել շատ կիրառեն ազատությունից զրկման այլընտրանքային միջոցները, այդ թվում՝ պատժի ժամանակահատվածի կրճատում, պատժից վաղաժամկետ ազատում և փորձաշրջանի կիրառում:

Առողջության ապահովման հետ կապված՝ անհրաժեշտ է հատուկ ուշադրություն դարձնել ազատությունից զրկված անձանց առանձնահատուկ կարիքներին, հատկապես՝ խոցելի խմբերին և/կամ ռիսկային խմբերին՝ ծերերին և նախկինում հիվանդություններ ձեռք բերած անձանց: Դա ներառում է նաև COVID-19-ի առկայությունը ստուգելու համար սքրինինգային հետազոտությունների իրականացումը և անհրաժեշտության դեպքում ինտենսիվ խնամքի ապահովումը: Բացի այդ, ազատությունից զրկված անձինք այս ընթացքում պետք է ստանան լրացուցիչ հոգեբանական աջակցություն:

Նմանատիպ հորդորներով հանդես են եկել նաև մի շարք միջազգային կազմակերպությունները։
Ինչ վերաբերում է Ձեր կողմից բարձրացրած՝ վարակման ռիսկային խմբում գտնվող կալանավորված անձանց գրավով ազատելու հարցին, ապա պետք է նշել, որ այդ հարցի լուծումը կոնկրետ քրեական գործերով նախաքննություն կամ դատական վարույթ իրականացնող մարմինների իրավասության տիրույթում է»։

Հիշեցնենք, որ ԵԽ Խոշտանգումների և անմարդկային կամ արժանապատվությունը նվաստացնող վերաբերմունքի կամ պատժի կանխարգելման եվրոպական կոմիտեի տարածած հայտարարության մեջ մասնավորապես ասված է.

«Հաշվի առնելով, որ անձնական շփումները խթանում են հիվանդության տարածումը՝ բոլոր համապատասխան մարմինների կողմից պետք է ջանքեր գործադրվեն՝ կիրառելու ազատությունից զրկման այլընտրանքային միջոցներ։ Այս մոտեցումը պարտադիր է հատկապես գերբնակեցման պայմաններում: Ավելին, պետական մարմինները պետք է առավել շատ կիրառեն ազատությունից զրկման այլընտրանքային միջոցները, այդ թվում՝ պատժի ժամանակահատվածի կրճատում, պատժից վաղաժամկետ ազատում և փորձաշրջանի կիրառում»։

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ