ԱԺ հանձնաժողովը հավանություն տվեց ԿԲ նախագահի պաշտոնում Մարտին Գալստյանի թեկնածությանը

ՀՀ ազգային ժողովը լիագումար նիստում կքննարկի Կենտրոնական բանկի նախագահի պաշտոնում Մարտին Գալստյանի թեկնածությունը. հարցը հավանության արժանացավ ԱԺ ֆինանսավարկային և բյուջետային հարցերի մշտական հանձնաժողովի նիստում: Գալստյանի թեկնածության հարցը հանձնաժողովի նիստում ստացավ 2 դեմ և 5 կողմ ձայներ: 
Գալստյանի թեկնածությունն առաջադրել էր «Իմ քայլը» խմբակցությունը: 
Հանձնաժողովի նիստում թեկնածուն պատասխանեց պատգամավորների զանազան հարցերի: Մասնավորապես հանձնաժողովի նախագահ Մանե Թանդիլյանը նշեց, որ ԿԲ մասին օրենքում նախագահը պետք է լինի մի անձ, որը ֆինանական համակարգում ունի բարձր հեղինակություն: Նա ասաց՝ որպեսզի որոշեն, թե արդյոք Գալաստյանն այդ անձն է, թե ոչ, պետք է իմանան նրա ներդրումները, ինչ է արել օրինակ որպես ԿԲ խորհրդի անդամ:  

Անդրադառնալով նրան, թե արդյոք ԿԲ նախագահ լինելու համար պարտադիր պետք է ունենա առևտրային բանկում աշխատելու փորձ, նա նշեց՝ Բեն Բեռնանկեն  և մյուսները մերժել են առևտրային գործունեութունը և նրանց հիմնական ֆոկուսը եղել է հանրայինն ու գիտականը: Գալստյանը կարծում է, որ ԿԲ-ի պարագայում դա արդարացված է, ԿԲ-ն հանդիսանում է նաև գիտահետազոտական իստիտուտ, որը օժանդակում է կառավարությանը: 

Անդրադառնալով հարցին, թե արդյոք իր գիտելիքները բավարար են, որ կարողանա ղեկավարել մի կառույց, որտեղ տեղի է ունեցել անցում դրամավարկայինից դեպի ֆինանսական կայունություն՝ վստահեցրեց, որ այո: «Իմ վերջին 1.5 տարվա գործունեությունը որպես խորհրդի անդամ, մեծապես առնչվել է այդ թեմաների հետ: Ֆինանսական կայունությունն ինչ-որ պահերի դառնում է ավելի կարևոր»,-ասաց նա:
Կենտրոնական բանկի գործող նախագահը Արթուր Ջավադյանն է: Նրա պաշտոնատավարման ժամկետը լրանում է ամռանը: