Արտակարգ իրավիճակ հայտարարելու նպատակն ընդդիմադիր ուժերին լռեցնել է․ Նարեկ Սամսոնյան

Իշխանությունների՝ արտակարգ իրավիճակ հայտարարելու նպատակն ընդդիմադիր ուժերին լռեցնել է, որն իսկապես ստացվել է իշխանությունների մոտ, քանի որ ընդդիմադիր ուժերը փորձելու են այս ընթացքում պասիվ լինել, այսօր իր ֆեյսբուքյան ուղիղ եթերի ժամանակ ասաց «Քաղաքացիական գիտակցություն» ՀԿ նախագահ Նարեկ Սամսոնյանը՝ խոսելով հայտարարված արտակարգ դրության և իշխանության գործելաոճի մասին:

Ըստ Նարեկ Սամսոնյանի՝ վարչապետ Նիկոլ Փաշինյանն այս ընթացքում տարաբնույթ ստեր է ասել և փորձում է ցույց տալ, որ ընդդիմությունը պետությանը վնաս է տալիս: «Մենք պետությանը երբեք վնաս չենք հասցրել և չենք հասցնելու, բայց պետությանը վնաս են հասցրել նրանք, ովքեր թույլ են տվել, որ այս դասալիքները պետության ղեկին գան: Պետություն այսօր չկա, պետությունը քայլող Նիկոլ Փաշինյանն է, և հիմա մեր խնդիրը այս պետությունը Նիկոլ Փաշինյանի ձեռքից վերցնելն է: Պետության հերը անիծված է, ինձ մոտ բարոյախրատական դասեր տալ պետք չէ, չկա պետություն, Հայաստանի Հանրապետությունը գոյություն չունի»,- ասաց նա:

«Վերցրեք ու նայեք երեկվա Կառավարության նիստը: Ես գետինն էի մտնում, որ այդ մանկապարտեզը արտակարգ դրություն հայտարարելու համար ստորակետ էր քննարկում: Եկե՛ք ծիծաղելի իրավիճակում չհայտնվենք՝ ասելով, թե օգնում ենք պետությանը, դուք այս պետությանը չեք կարող օգնել»,- շեշտեց Սամսոնյանը: Վերջինիս խոսքով՝ ոչ ոք չպետք է Նիկոլ Փաշինյանին օգնի, որովհետև միևնույն է, նա շնորհակալ չի լինելու և մեղադրելու է քաղաքացիներին:

«Ես չեմ պատրաստվում օգնել, չեմ կարող օգնել կամ խանգարել այս մանկապարտեզին: Եթե ուզում եք մեր երկրին օգնել, ապա օր առաջ մտածեք, թե ինչպես արտակարգ իրավիճակից հետո այս պետությունն ազատել Նիկոլ Փաշինյանից: Հասկանո՞ւմ եք, մենք այնպիսի մարդու հետ գործ ունենք, որն ասում է՝ ճգնաժամը «ճգնել» բառից է, ուրեմն մենք պետք է ճգնենք: Այս աստիճանի անճար են նրանք»: