19 07 2019

Ադրբեջանին ամերիկյան ռազմական օգնությունը կտրուկ աճել է, Հայաստանինը՝ ոչ

Ադրբեջանին ամերիկյան ռազմական օգնությունը կտրուկ աճել է, Հայաստանինը՝ ոչ

«Ռազմինֆոն» կայքը գրում է.

«2018 և 2019 ֆիսկալ տարիներին ԱՄՆ պաշտպանության և պետական դեպարտամենտների՝ միջազգային ռազմական և իրավապահ ոլորտներում ֆինանսական օժանդակությամբ Ադրբեջանին հատկացվող միջոցները կազմել են ավելի քան 102,5 մլն դոլար:

Այս թեմայով վերլուծություն է հրապարակել ԱՄՆ Հարավային Կալիֆորնիայի համալսարանի հայագիտական ուսումնասիրությունների ինստիտուտի վերլուծաբան Էմիլ Սանամյանը:

2018 ֆիսկալ տարում Ադրբեջանին է տրամադրվել $59,667,000, իսկ 2019թ. ֆիսկալ տարվա համար նախատեսված է $42,910,000, ընդհանուր՝ $102,577,000:

Հայաստանին 2018-ին տրամադրվել է $4,172,000, 2019 եւ 2020 ֆիսկալ տարիներին Հայաստանի համար նախատեսվում է համապատասխանաբար՝ 2,8 եւ 2,1 մլն ԱՄՆ դոլարի օժանդակություն։

Ադրբեջանի օժանդակության մեծագույն մասը՝ $101,515,000, տրամադրվում է Section 333 Authority to Build Capacity ծրագրով, որը նախատեսում է նյութական օգնություն եւ պարապմունքներ հակաահաբեկչական, կազմակերպված հանցավորության եւ թմրաշրջանառության դեմ պայքարի, առափնյա եւ սահմանային անվտանգության, ռազմական հետախուզության ոլորտներում:

2018թ. ֆիսկալ տարում Հայաստանին տրամադրված օժանդակության մեծ մասն էլ՝ $3,200,000, տրամադրվել է International Narcotics Control and Law Enforcement ծրագրով, որը նախատեսում է նյութական օգնություն եւ պարապմունքներ թմրանյութերի շրջանառության եւ հանցավորության դեմ պայքարի համար:

Նախորդ տարիներին տրամադրվող միջոցների համեմատ 2018–19–ին Ադրբեջանին տրամադրվող օժանդակության աճը կտրուկ է: Օրինակ՝ 2017-ին Ադրբեջանը ստացել էր ընդամենը 2 մլն ԱՄՆ դոլարի օժանդակություն:

Հայաստանին տրամադրվող միջոցները գումարային առումով թեեւ անհամեմատելի են Ադրբեջանի հետ, սակայն համեմատության մեջ 2018-ի օժանդակությունը 2 մլն ԱՄՆ դոլարով ավելի է եղել քան 2017-ին։

[Հավելում] Ռազմինֆոյի հետ զրույցում Էմիլ Սանամյանը Ադրբեջանին տրամադրվող օգնության կտրուկ աճը պայմանավորում է Իրանի հանդեպ ԱՄՆ քաղաքականությամբ: Ըստ նրա՝ ԱՄՆ-ն փորձում է ավելի շատ երկրներ միացնել հակաիրանական կոալիցիային, եւ այս օգնությունը դիտում է հենց այդ համատեքստում: Ինչ վերաբերում է Հայաստանին, ապա, ըստ պարոն Սանամյանի, մեր երկրի հանդեպ դրական եւ հագեցած դինամիկա չի նկատվում, չնայած՝ ԱՄՆ Ներկայացուցիչների պալատում դեմոկրատները փորձում են շտկել դա:

Հիշեցնենք, որ 2016-ին «Ռազմինֆոն», հիմնվելով նույն աղբյուրի վրա, հաշվել էր տարբեր ծրագրերով 2000–ից 2017 թվականներին ԱՄՆ-ի՝ Հայաստանին եւ Ադրբեջանին տրամադրված ֆինանսակայն օժանդակությունը: Ըստ դրա՝ նշված տարիների ընթացքում Հայաստանը ստացել էր $124,014,527-ի, իսկ Ադրբեջանը՝ $254,495,911-ի օժանդակություն»:

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ