06  07  2019

Պատգամավորները տեղյակ չեն դատական բարեփոխումների աշխատանքների մասին. Փաստինֆո

Պատգամավորները տեղյակ չեն դատական բարեփոխումների աշխատանքների մասին. Փաստինֆո

ՀՀ ԱԺ պետաիրավական հարցերի մշտական հանձնաժողովի մի շարք անդամներ տեղյակ չեն իրենց հանձնաժողովի եւ Արդարադատության նախարարության կողմից համատեղ դատաիրավական բարեփոխումների շրջանակներում իրականացվող աշխատանքների, դատավորների բարեվարքության գնահատման կառուցակարգի մշակման մասին:

Հիշեցնենք, որ հուլիսի 3-ին Արդարադատության նախարարությունը հայտարարություն էր տարածել, թե Դատաիրավական բարեփոխումների շրջանակում նախարարությունն Ազգային ժողովի Պետական-իրավական հարցերի մշտական հանձնաժողովի հետ համատեղ աշխատանքներ է իրականացնում։ Մասնավորապես՝ մշակվում է դատավորների բարեվարքության գնահատման կառուցակարգը, դրա համատեքստում հստակեցվում Բարձրագույն դատական խորհրդի՝ որպես դատավորի բարեվարքությունը գնահատող մարմնի լիազորությունները, մշակվում են Դատավորների բարեվարքության գնահատումն իրականացնելու համար անհրաժեշտ օրենսդրական հիմքերը։

‹‹Փաստինֆո››-ն  փորձել է ԱԺ պետաիրավական հանձնաժողովի անդամներից ճշտել, թե ինչպես են ընթանում նշված փաստաթղթերի մշակման աշխատանքները, ովքեր են դրանց մասնակցում։ Պարզվել է, որ հանձնաժողովի ոչ միայն ընդդիմադիր, այլ նաեւ իշխող ուժին՝ «Իմ քայլը» խմբակցությունը ներկայացնող պատգամավորներն անտեղյակ են։

‹‹Բարգավաճ Հայաստան›› խմբակցության պատգամավոր, պետաիրավական հարցերի մշտական հանձնաժողովի անդամ Գեւորգ Պետրոսյանն ասել է, որ համագործակցության որեւէ առիթ չի եղել երկու կողմերի միջեւ, եւ նորանշանակ նախարարի մասնակցությամբ հանդիպումներ չեն եղել:

Հանձնաժողովի մեկ այլ անդամ, ‹‹Լուսավոր Հայաստան›› խմբակցության պատգամավոր Տարոն Սիմոնյանն էլ փոխանցել է, որ ինքը նույնպես տեղյակ չէ նման աշխատանքներից. ‹‹Գուցե իրենք իշխանական պատգամավորների հետ են քննարկումներ իրականացնում»:

«Իմ քայլի» պատգամավորներ Նիլոլայ Բաղդասարյանը եւ Սերգեյ Ատոմյանը, որոնք պետաիրավական հարցերի հանձնաժողովի անդամ են, նույնպես կարծես տեղյակ չէին:

Բաղդասարյանը չհասկացավ՝ թե ինչ նախագծի մասին է խոսքը:

Պարոն Բաղդասարյան, Դուք մասնակցո՞ւմ եք Արդարադատության նախարարության հետ իրականացվող դատաիրավական համակարգի բարեփոխումների աշխատանքներին:

Ի՞նչ է նշանակում դատաիրավական բարեփոխումներ։ Դատաիրավական բարեփոխումները, եթե բացատրեք, թե ինչի մասին է խոսքը՝ կասեմ։ Բավական ծավալուն փոփոխություն է կատարվել ‹‹Հարկադիր ծառայության մասին›› օրենքում, դա բարեփոխու՞մ է, թե՞ ոչ:

Խոսքը Բարեվարքության նախագծի մասին է։

Ինչի՞ մասին…

Նախարարությունը հաղորդագրություն էր տարածել, որ պետաիրավական հանձնաժողովի հետ համատեղ դատաիրավական բարեփոխումների շրջանակներում աշխատանքներ են իրականացվում դատավորների բարեվարքության գնահատման նախագիծը մշակելու ուղղությամբ։

Դա որն է, ես չգիտեմ։

Այսինքն՝ նման քննարկումներից տեղյակ չե՞ք։

Նկատի ունեք էթիկայի նորմե՞րը….

Ի վերջո հասկանալով, թե ինչի մասին է խոսքը պատգամավորն ասել է, որ մեր հարցին կարող է պատասխանել միայն Պետաիրավական հարցերի մշտական հանձնաժողովի նախագահ Վլադիմիր Վարդանյանը. «Այն նախագիծը, որն ինձ է մակագրված ես կարող եմ պատասխանել, իսկ որը իրեն՝ միայն ինքը կարող է պատասխանել: Լսել եմ նման մի բան, բայց միայն ինքն ու տեղակալը կարող են պատասխանել»:

Սերգեյ Ատոմյանը եւս տեղյակ չէր, թե ովքեր են մասնակցում, բայց վստահեցրեց, թե քննարկումներ տեղի ունենում են:

Փորձել են կապ հաստատել հանձնաժողովի նախագահի Վլադիմիր Վարդանյանի հետ՝ պարզելու, ի  վերջո, պետաիրավական հանձնաժողովը մասնակցո՞ւմ է նախագծերի մշակման աշխատանքներին, ինչպես հայտարարել է ԱՆ-ն, եթե այո, ապա ովքեր են ներգրավված, քանզի մեր զրուցակից պատգամավորներն անտեղյակ էին, բայց նա իմանալով, որ իրեն զանգահարողը լրագրող է, ասել է՝ երկրում չէ ու անջատեց հեռախոսը:

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ