Պետք չէ զուգահեռներ տանել Արցախի և Աբխազիայի կամ Դոնբասի միջև. Փաշինյան

ՀՀ վարչապետ Նիկոլ Փաշինյանը հարցազրույց է տվել գերմանական հանրային հեռարձակող «Դոյչե Վելե»-ին։

Անդրադառնալով ԼՂ հակամարտության կարգավորման խնդրին՝ Փաշինյանը կրկնել է այն հայտարարությունները, որ Ադրբեջանի նախագահ Իլհամ Ալիևի հետ հանդիպումները դեռ ոչ պաշտոնական են, և դրանք բանակցություններ չի կարելի համարել։ Փաշինյանը կրկին ընդգծել է՝ չի կարող բանակցել Արցախի անունից, քանի որ Արցախի բնակիչները չեն մասնակցել ընտրություններին և իրեն նման մանդատ չեն տվել:

Պատասխանելով այն հարցին, թե Հայաստանը կցանկանա՞ր, որ Ռուսաստանը  ճանաչի Լեռնային Ղարաբաղի անկախությունը, ինչպես դա արեց Աբխազիայի դեպքում, ՀՀ վարչապետը նշել է, որ կարծում է` պետք չէ զուգահեռներ տանել Արցախի և Աբխազիայի միջև: Փաշինյանը շեշտել է, որ զուգահեռներ հարկավոր չէ տանել նաև Արցախի և Դոնբասի միջև։

«Դրանք լիովին այլ հակամարտություններ են և տարբեր իրավիճակներ: Աբխազիայի բնակիչները ներկայումս կարող են ժամանել Թբիլիսի, առևտուր անել այնտեղ, շփվել մարդկանց հետ, և այնտեղ դա սովորական բան է: Սակայն ԼՂ հակամարտության դեպքում դա հնարավոր չէ: Ադրբեջանից արտաքսում են ազգությամբ հայերին, այդ թվում` այլ երկրների քաղաքացի»,- նշել է նա:

Հեղափոխության վերաբերյալ հարցին, թե ինչու ՌԴ նախագահը, որը չի սիրում հեղափոխություններ,  Հայաստանում տեղի ունեցած հեղափոխության նկատմամբ բավականին հանդուրժող և չեզոք է եղել, Փաշինյանը պատասխանել է․

«Գիտեք`  հեղափոխությունում որևէ օտարերկրյա ուժի միջամտություն չկար: Դա զուտ ներհայաստանյան քաղաքական գործընթաց էր: Եվ կարող եմ ասել, որ ոչ մի արտաքին ուժ մեր ներքին գործընթացներում ներգրավվելու հնարավորություն չուներ»։

Հարցազրույցն ամբողջությամբ՝ տեսանյութում։