Հուսով եմ, որ ՀՀ ղեկավարությունը դուրս կբերի իր ուժերը գրավված տարածքներից. Ալիև

Ադրբեջանի նախագահ Իլհամ Ալիևը կրկին խոսել է ղարաբաղյան հակամարտության կարգավորման ցանկացած տարբերակի մասին: Այս մասին հայտնում է Азертадж-ը:

Աղդամի շրջանի հասարակայնության ներկայացուցիչների և արվեստի գործիչների հետ հանդիպման ընթացքում Ալիևը հերթական անգամ հավաստիացրել է, որ Ադրբեջանը ռազմական տեսակետից մտնում է ուժեղ պետությունների թվի մեջ՝ ոչ միայն Հայաստանի համեմատ, այլ նաև համաշխարհային մասշտաբով: Նա ընդգծել է ռազմական հզորությունն էլ ավելի մեծացնելու մտադրության մասին՝ համոզմունք հայտնելով, որ դա կարևորագույն գործոններից մեկն է բանակցությունների համար:

«Քանի որ, ցավոք, միջազգային իրավունքի նորմերը լիովին անտեսվում են: Մենք պահանջում ենք արդարությունը: Պահանջում ենք, որ մեր պատմական հողերն ազատվեն օկուպանտներից, և դրանք կազատվեն: Հուսով եմ, որ Հայաստանի ղեկավարությունը, ճիշտ վերլուծելով տարածաշրջանում ստեղծված իրադրությունը, դուրս կբերի իր օկուպացիոն ուժերը»- հայտարարել է Ալիևը:

Ալիևը նաև հիշեցրել է ապրիլյան պատերազմի մասին` նշելով, որ իրենց իբր հաջողվել է տարածքներ ազատագրել:

«Ապրիլյան մարտերը մեր մեծ հաղթանակն են: Դա վկայում է այն մասին, որ ադրբեջանական ժողովուրդը երբեք չի հաշտվելու օկուպացիայի հետ: Հայաստանի կրած ծանր ռազմական պարտությունն ավերեց վերջինիս՝ առանց այն էլ անկայուն հիմքերը: Դրա վառ օրինակն են այս տարվա գարնանը Հայաստանում տեղի ունեցած իրադարձությունները»,- ասել է Ադրբեջանի ղեկավարը: