03 10 2018

ՀՀԿ-ն, ՀՅԴ-ն և ԲՀԿ-ն չեն պատրաստվում վարչապետի թեկնածու առաջադրել. Փաշինյան

ՀՀԿ-ն, ՀՅԴ-ն և ԲՀԿ-ն չեն պատրաստվում վարչապետի թեկնածու առաջադրել. Փաշինյան

Պատգամավորների հետ բանակցություններից հետո ԱԺ բակում վարչապետ Նիկոլ Փաշինյանը հայտարարեց՝ Ազգային ժողովի ՀՀԿ, ՀՅԴ և «Ծառուկյան» խմբակցություններն ասացին, որ ընկալում են ժողովրդի ուղերձը, հարգանքով են վերաբերում դրան և անկախ հուշագրից՝ չեն պատրաստվում ոչ առաջին, ոչ երկրորդ փուլում վարչապետի թեկնածու առաջադրել։ 

«Մենք ասացինք, որ երկրում քաղաքական ճգնաժամ է հաստատված, և այդ քաղաքական ճգնաժամը պետք է հաղթահարենք։ Որպես տարբերակ՝ ես ասացի, որ ես առաջիկա օրերին պետք է հրաժարական տամ վարչապետի պաշտոնից, ակնկալում եմ, որպեսզի Հանրապետական կուսակցությունն ու խորհրդարանն ավելի չգրգռեն մարդկանց, որովհետև եթե ես հրաժարական տամ, և այդ խմբակցություններն առաջադրեն վարչապետի թեկնածու, տեսականորեն նույնիսկ կարող են ընտրել որևէ մեկին վարչապետ, բայց պետք է գիտակցեն, որ դա մարդկանց մոտ ռեակցիա է առաջացնելու։

Ասացի, որ դա խելացի սցենար չի լինելու, մարդկանց մոտ կառաջացնի վատ արձագանք, մեղմ ասած, վատ արձագանք, և ես կարծում եմ, որ լավ կլինի՝ մենք ստորագրենք փաստաթուղթ, որ այսինչ օրը ես հրաժարական տամ, խմբակցությունները վարչապետի թեկնածու չեն առաջադրի երկու անգամ, ինչի արդյունքում մենք դեկտեմբերին կունենանք արտահերթ խորհրդարանական ընտրություններ։ Խորհրդարանական ուժերի ներկայացուցիչները կարծես թե ըստ էության ասացին, որ ընկալում են ժողովրդի ուղերձը և հարգանքով են վերաբերում ժողովրդի ուղերձին ու դիրքորոշմանը, և նրանք բանավոր ասացին, որ անկախ հուշագրից՝ չեն պատրաստվում ոչ առաջին, ոչ էլ երկրորդ փուլով առաջադրել վարչապետի թեկնածու»,–մանամասնեց Նիկոլ Փաշինյանը։

Վարչապետը նշեց, որ ինքը ժողովրդի անունից է խոսել և հայտնել պատգամավորներին, որ պետք է արտահերթ խորհրդարանական ընտրություններն անցկացվեն դեկտեմբերի առաջին կեսին. «Ինձ հարցրին, թե ինչու դեկտեմբերին ու ոչ մայիսին։ Ես երկու պատճառ եմ ասել։ Նախ՝ երկրում քաղաքական ճգնաժամ է, երկրորդ, ասել եմ, որ 1-1.5 ամիս է՝ զգում եմ, որ բոլոր հարցերը մղվել են երկրորդ պլան, մարդիկ մենակ ասում են՝ արեք արտահերթ ընտրություններ, ես ժողովրդից զգում եմ պահանջը, ով խոսում ա, ասում ա՝ արտահերթ ընտրությունները ե՞րբ եք անելու, արեք, էլ չենք դիմանում»։

Թե ինչու պետք է ընտրություններն անցկացվեն դեկտեմբերին, Փաշինյանը պարզաբանեց, որ դա պայմանավորված է Սահմանադրությամբ. 14 օր պետք է, որ երկու փուլով վարչապետ չընտրվի, իսկ դրանից հետո արտահերթ ընտրությունները նշանակվում են ոչ շուտ, քան 30 և ոչ ուշ, քան 40 օրում։

«Հիմա մենք կարող ենք արձանագրել հետևյալը, որ մենք այսօր ցույց տվեցինք, որ հենց այսօր Հայաստանում արտահերթ խորհրդարանական ընտրություններ անցկացնելը քաղաքացիական, համաժողովրդական, համազգային պահանջ է, և այն քաղաքական ուժն ու ուժերը, որոնք դեմ կգնան այս պահանջին, ուղիղ պատերազմ են հայտարարում ժողովրդին»,– նշեց Նիկոլ Փաշինյանը։

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ