Վարչապետը խնդիր դրեց, որ, ընտրելով իր թիմի առաջադրած թեկնածուին, իրեն վստահության քվե կհայտնեն. ՀՅԴ թեկնածու

Երևանի քաղաքապետի ՀՅԴ-ական թեկնածու Միքայել Մանուկյանը սեպտեմբերի 23-ին, քվեարկեց հանուն բարեկեցիկ ու կանաչապատ Երևանի ու հանուն մայրաքաղաքի միասնականության և համերաշխության:

Քվեարկությունից հետո լրագրողների հետ զրույցում թեկնածուն քարոզարշավի ընթացքը բավարար գնահատեց. «Մի քիչ քաղաքականացվեց և գնաց վարչապետին սատարելու ընտրության, վարչապետի մասնակցությունն ընդհանրապես ավագանու, տեղական ընտրությունները շեղում է դեպի համապետական ընտրություններ: Վարչապետը խնդիր դրեց, որ, ընտրելով իր թիմի առաջադրած թեկնածուին, իրեն վստահության քվե կհայտնեն, ինչը, կարծում եմ, վարչական լծակի օգտագործում էր »:

Ըստ նրա՝ քաղաքացին այսօր բարձր ինքնագիտակցություն ունի: Մանուկյանը հույս ունի, որ յուրաքանչյուրը խղճի մտոք է քվեարկելու.«Շատ լավ մթնոլորտ է տիրում ընտրատեղամասերում, ոչ մի խնդիր դեռևս չի եղել: Ամեն ինչ իր բնականոն հունով գնում է»:

Մանուկյանը պատրաստակամություն հայտնեց, որ, անկախ ընտրությունների արդյունքից, թե ով կդառնա քաղաքապետ՝ պատրաստ է համագործակցել այդ ուժի հետ:

Հարցին, թե արդյո՞ք ընտրակաշառքի վերաբերյալ ահազանգեր լսել են՝ Մանուկյանը պատասխանեց, որ խոսակցություններ են ուղղակի եղել.«Երեկ, սակայն, ոստիկանության կողմից այլ բան տեսանք. պետք է մի փոքր ավելի պրոֆեսիոնալ լինել, ի՞նչ է նշանակում 80 հոգով մտնել «Բարգավաճ Հայաստան» կուսակցության գրասենյակ, իսկ վերջում ասել՝ ոչինչ չգտանք: Պետք է ավելի լուրջ մոտենալ այս հարցին: Հիմա լրագրողներն էլ լուրեր են գրում՝ ասելով, թե՝ ըստ հավաստի աղբյուրների՝ այսինչն է պատահել, սակայն, կարծում եմ, ոստիկանությունը պետք է ավելի լուրջ մոտենա ամեն ինչին»: