Ադրբեջանն ավելի շատ զենք է ցանկանում գնել Իսրայելից. BBC

Իսրայելի պաշտպանության նախարար Ավիգդոր Լիբերմանն այցելել է Ադրբեջան՝ Իլհամ Ալիևի և ուժային գերատեսչությունների ղեկավարների հետ հանդիպելու համար։ Ադրբեջանն այն սակավաթիվ մահմեդական պետություններից է, որը լավ հարաբերություններ ունի Իսրայելի հետ, և վաղուց իսրայելական զենք է գնում, գրում է BBC-ն։

Փորձագետների կարծիքով՝ պաշտպանության նախարարի այս այցը ևս կապված է ռազմական համագործակցության հերթական փուլի հետ: Ադրբեջանի պաշտպանության նախարարությունն ու պաշտոնական պետական գործակալությունը դեռևս մանրամասներ չեն ներկայացրել հանդիպումից:

«Ադրբեջանը չի թաքցնում, որ իսրայելական արտադրանքն իրեն արդարացրել է նախկինում: Օրինակ, 2016 թվականին Ադրբեջանը կիրառել է ժամանակակից իսրայելական անօդաչու թռչող սարքեր, որոնք հայկական կողմին դժվարությունների առաջ էին կանգնեցրել»,- նշել է ռազմական փորձագետ Ուզեիր Ջաֆարովը: 

Փորձագետի խոսքով՝ իրենց արդարացրել են Spike հակատանկային հրթիռները: Ջաֆարովը նշում է՝ Ավիգդոր Լիբերմանի այցի ժամանակ զենքի հարցով նոր որոշումներ կկայացվեն, որոնց մասին հնարավոր կլինի իմանալ միայն տարեվերջին, երբ երկիրը ՄԱԿ-ում հաշվետվություններ ներկայացնի՝ նշելով գնված և վաճառված ռազմական արտադրանքը։