Ավարտվեց ևս մեկ բազմամարդ հանրահավաք, ընդդիմության պլանները՝ ապրիլի 18-ին. լուսանկարներ

Հանրապետության հրապարակում բազմամարդ հանրահավաք անցկացրեց «Քաղաքացիական պայմանագիր» կուսակցության առաջնորդ, ԱԺ պատգամավոր Նիկոլ Փաշինյանը:

Նա հայտարարեց, որ շարունակում են նույն մարտավարությամբ, պարզապես՝ ավելի լայն: Ապրիլի 18-ին կոչ արեց Ֆրանսիայի հրապարակում հավաքվել առավոտյան 10-ից և սկսել բողոքի ակցիաները՝ փողոցի փակումները, շենքերի շրջափակումները՝ մայրաքաղաքի մի ծայրից մյուսը, փակել բոլոր մայրուղիները: Փաշինյանը հայտարարեց, որ գյուղերում և քաղաքներում ևս սկսում են փողոցների փակումներ, պետական գերատեսչությունների շրջափակումը:

«Առաջիկա օրերին մենք կձևավորենք ՀՀ-ում ժողովրդական, թավշյա հեղափոխության կոմիտե, որը կղեկավարի այս շարժումը»,- ասաց Նիկոլ Փաշինյանը:

Կարևոր է, ըստ Փաշինյանի, ցանցային գործելակերպը՝ ժողովուրդն ինքկնակազմակերպվի և իրենք իրենց փակեն փողոցներ և ակտիվություն ցուցաբերեն:

Ինչ վերաբերում է հանրահավաքը Հանրապետության հրապարակում անցկացնելուն, Փաշինյանն այսպես մեկնաբանեց. «Մենք տեղափոխվել ենք Հանրապետության հրապարակ՝ ցույց տալու համար, որ Հայաստանի Հանրապետությունը գոյություն ունի, ՀՀ քաղաքացին գոյություն ունի, և Հանրապետության ամենամեծ հրապարակը լեցուն է ընդդեմ Սերժ Սարգսյանի և ընդդեմ Հանրապետական կուսակցության»

Դիմելով Սփյուռքահայ մավորականներին՝ Սերժ Թանկյանին, Արսինե Խանջյանին, Շառլ Ազավուրին, նրանց Նիկոլ Փաշինյանը հրավիրեց Հայաստան՝ պայքարին միանալու՝ իր խոսքով՝ հեղափոխությունն ամբողջացնելու համար:

Նաև շնորհակալություն հայտնեց այն սփյուռքահայերին, որոնք պայքարի շարունակման համար գումարներ են փոխանցում, սակայն կոչ արեց գումարի փոխարեն իրենք գան:

Հանրահավաքն ավարտվեց երթով:

Ապրիլի 17-ի դեպքերի ժամանակագրությունը՝ այստեղ: