Պատրաստվի՛ր, Ռուսաստա՛ն, նոր և խելացի հրթիռները գալիս են. Դոնալդ Թրամփ

Միացյալ Նահանգների նախագահ Դոնալդ Թրամփն իր թվիթերյան էջում հայտարարել է Սիրիայի դեմ իրականացվելիք հրթիռային հարվածի մասին: Այս մասին հայտնում է Gazeta.ru-ն:

Այս կերպ 71-ամյա ղեկավարն արձագանքել է Լիբանանում Ռուսաստանի դեսպան Ալեքսանդր Զասիպկինի հայտարարությանն առ այն, որ Սիրիայի ուղղությամբ ԱՄՆ-ի կողմից հրթիռների արձակման դեպքում դրանք, ինչպես նաև դրանց արձակման վայրերը կկործանվեն:

«Ռուսաստանը խոստանում է խոցել Սիրիայի դեմ ուղղված բոլոր հրթիռները: Պատրաստվի՛ր, Ռուսաստա՛ն, քանի որ դրանք՝ լավ, նոր և «խելացի» հրթիռները, գալու են: Դուք չպետք է գործընկերներ լինեիք սեփական ժողովրդին գազով սպանող ու դրանից հաճույք ստացող կենդանու հետ»,-գրել է Թրամփը:

Հիշեցնենք, որ ավելի վաղ Միացյալ Նահանգների 71-ամյա ղեկավարը, անդրադառնալով ենթադրյալ քիմիական հարձակման դեպքին, դատապարտել էր Ռուսաստանի նախագահ Վլադիմիր Պուտինին՝ Սիրիայի նախագահ Բաշար ալ Ասադին շարունակ աջակցելու համար:

Թրամփի հայտարարությանը հաջորդել է ՌԴ ԱԳՆ պատասխանը:

Ռուսաստանի Դաշնության արտաքին քաղաքական գերատեսչության մամուլի խոսնակ Մարիա Զախարովան իր Ֆեյսբուքի էջում նշել է, որ Թրամփի հիշատակած ամերիկյան հրթիռները պետք է թռչեն ահաբեկիչների և ոչ թե դրանց դեմ տարիներ շարունակ պայքարող օրինական կառավարության ուղղությամբ:

Զախարովան հայտարարել է, որ ԱՄՆ-ի «խելացի» հրթիռները, որոնց մասին խոսում է նախագահ Դոնալդ Թրամփը, կարող են ոչնչացնել Սիրիայում քիմիական զենքի կիրառման բոլոր ապացույցները: