Բացահայտումներ՝ արտաքսված ռուս դիվանագետների մասին

ՌԴ արտաքին հետախուզական ծառայության ղեկավար Սերգեյ Նարիշկինը խոստովանել է, որ արևմտյան երկրներից «Սկրիպալի գործի» առնչությամբ արտաքսված ռուս դիվանագետների շրջանում կան հետախուզության աշխատակիցներ: Այս մասին հաղորդում է «ՌԻԱ Նովոստի»-ն: «Նրանք մարդիկ են, որոնք պաշտոնապես ներկայացվել են այդ երկրներում որպես Արտաքին հետախուզական ծառայության աշխատակիցներ, որոնք ապահովել են այդ երկրների հատուկ ծառայությունների հետ փոխգործակցությունը, այսպես կոչված, գործընկերային կապի գծով»,- ասել է Արտաքին հետախուզական ծառայության տնօրենը:

Դիվանագետների արտաքսումը պաշտոնյան որակել է որպես կեղտոտ և ցինիկ սադրանք և նշել, որ կհետևի կոշտ պատասխան:

Նարիշկինի խոսքով՝ Արտաքին հետախուզական ծառայությունն ունի հետախուզական գործունեություն վարելու համար լայն գործիքակազմ, որն ապահովում է ՌԴ անվտանգության ապահովման հետ կապված խնդիրների լուծումը:

Հիշեցնենք, որ ավելի վաղ Եվրոպական մի շարք երկրներ և ԱՄՆ-ն արտաքսել էին ռուս դիվանագետներին:  Իսկ Մեծ Բրիտանիայի վարչապետ Թերեզա Մեյը հայտարարել էր 23 ռուս դիվանագետի արտաքսելու մասին՝ ռուս նախկին լրտես Սերգեյ Սկրիպալի ու նրա դստեր թունավորման առնչությամբ: Նա հայտարարել էր նաև Ռուսաստանի հետ բարձր մակարդակով կնքված պայմանագրերի չեղարկման մասին: Բացի այդ, չեղարկվել է Մեծ Բրիտանիա այցելելու համար Ռուսաստանի արտգործնախարար Սերգեյ Լավրովին ուղարկված հրավերը: