Ե՞րբ Իրանը կհարվածի Իսրայելին

ՄԱԿ-ում Իրանի մշտական ներկայացուցչությունը մեկնաբանել է ԱՄՆ ուղերձների փոխանակման մանրամասները, տեղեկացրել է Mehr-ը։

Ուրբաթ պատասխանելով այն հարցին, թե արդյոք Իրանը կհետաձգի պատասխանն Իսրայելին մինչեւ Գազայում հրադադարի բանակցությունները, որոնք կայանալու են հաջորդ շաբաթ, ներկայացուցչությունը հայտնել է, որ Գազայում հրադադարի հաստատումը գերակա է Իրանի համար։ «Ցանկացած համաձայնագիր, որը կընդունի ՀԱՄԱՍ-ը, կընդունվի մեր կողմից»,- հայտնել են դիվանագիտական առաքելությունում։

«Մեր ազգային անվտանգությունը եւ ինքնիշխանությունը խախտվել են իսրայելական վարչակարգի վերջերս տեղի ունեցած ահաբեկչությամբ։ Մենք օրինական պաշտպանության իրավունք ունենք, եւ դա ոչ մի կապ չունի Գազայում հրադադարի հետ։ Բայց մենք հուսով ենք, որ մեր պատասխանը կավարտվի ժամանակին եւ այնպես, որպեսզի չվնասի հնարավոր հրադադարին»,- նշվել է ՄԱԿ-ում Իրանի մշտական ներկայացուցչությունում։

Ինչ վերաբերում է Իրանի եւ ԱՄՆ-ի միջեւ գոյություն ունեցող կապի խողովակներին, իրանական առաքելությունը ՄԱԿ-ում հայտնել է. «Միշտ առկա են եղել ուղիղ եւ միջանկյալ պաշտոնական ուղիներ Իրանի եւ ԱՄՆ-ի միջեւ տեղեկատվության փոխանակման համար»։

Հայտարարությունում ընդգծվել է, որ կողմերը նախընտրում են պահել մանրամասների գաղտնիությունը։