Վաշինգտոնն աննախադեպ ճնշում է գործադրում հետխորհրդային տարածքի բոլոր պետությունների վրա․ Պատրուշև

«Վաշինգտոնն աննախադեպ ճնշում է գործադրում հետխորհրդային տարածքի բոլոր պետությունների վրա»,- ՀԱՊԿ երկրների ԱԽ քարտուղարների և Բելառուսի նախագահ Ալեքսանդր Լուկաշենկոյի հանդիպման ժամանակ ասել է ՌԴ Անվտանգության խորհրդի քարտուղար Նիկոլայ Պատրուշևը։ Այս մասին հայտնում է «ՌԻԱ Նովոստի»-ն։

ԱՄՆ-ի նպատակը, ըստ Պատրուշևի, նախկին ԽՍՀՄ երկրների կառուցողական հարաբերությունները քայքայելն է, ԱՊՀ-ի, ԵԱՏՄ-ի և ՀԱՊԿ-ի շրջանակներում ինտեգրացիան խոչընդոտելը:

Ըստ ՌԴ անվտանգության խորհրդի քարտուղարի, իրենց ծրագրերն ի կատար ածելու համար անգլոսաքսերը շանտաժի, խաբեության և սպառնալիքների միջոցով փորձում են իրենց շրջանակում ներգրավել առավելագույն թվով պետությունների, որոնց շահերի հետ նույնիսկ հաշվի չեն նստում։

Այնուհետև լրագրողների հետ զրույցում Պատրուշևն ասել է, որ Ուկրաինայի ղեկավարությունը պատրաստ էր խաղաղություն կնքել, սակայն հրաժարվել է դրանից ԱՄՆ-ի ճնշման ներքո: Ուկրաինայի ղեկավարները, ըստ նրա, Ռուսաստանին ներկայացրել էին գրավոր առաջարկներ, որոնք ընդունվել էին։