Միջազգային խայտառակություն կլիներ, որ Հայաստանի ԱԺ-ն պաշտպանում է Ադրբեջանի դիրքորոշումը․ Թևանյան

 ՔՊ - ն ԱԺ արտաքին հարաբերությունների հանաձնաժողովի այսօրվա նիստում  չընդունեց Լաչինի միջանցքի վերաբերյալ ընդդիմության նախագիծը, որից հետո, լրագրողներին տված հարցազրույցում  «Հայաստան» խմբակցության պատգամավոր Անդրանիկ Թևանյանն ասաց․

«Մեր և իշխանության դիրքորոշումները ֆունդամենտալ տարբերություն ունեն, իրենք Ղարաբաղը հանձնել են Ադրբեջանին, և դա է նաև պատճառը, որ Ադրբեջանը հանցավոր գործողությունների է դիմում և փակում Լաչինի միջանցքը: Եթե իշխանության դիրքորոշումն այն է, որ ղարաբաղցիները Ադրբեջանի մաս են կազմում որպես քաղաքացիներ, թող իրենք իրար մեջ որոշումներ կայացնեն, խնդիրները լուծեն, այդ դեպքում Ադրբեջանը գնում է հանցավոր գործողությունների, լաչինի միջանցք է փակում, վաղն էլ Ստեփանակերտ են մտնելու: Սրանց մոտեցումը հետևյալն է, ասում են՝ Ղարաբաղը զիջենք, որ Հայաստանի ինքնիշխանությունը պահենք, բայց նաև  ասում են՝ դա էլ երաշխիք չի: Վտանգավոր տեսակետ հնչեց, որ Հայաստանի շահերը կարող են հակասել Արցախի շահերին, և իրենց հետաքրքրում է  բացառապես ՀՀ շահը: Թվում է՝ անտեղյակ մարդու համար նորմալ բան են ասում, ասում են՝ մենք պայքարում ենք ՀՀ ինքնիշխանության, տարածքային ամբողջականության համար և  եթե դրա գինը Ղարաբաղն է, իրենք պատրաստ են տալ: Բայց  ամբողջ խնդիրն այն է, որ նույնիսկ դա չի աշխատում: Նիկոլ Փաշինյանն անձամբ է խոստովանում, որ ինքը երաշխիք չունի, որ Ադրբեջանը կհանգստանա Արցախով: Ինքն ասում է՝ Ադրբեջանն ամբողջ Հայաստանն է պահանջում, ու ճիշտ է ասում»,- ասաց Անդրանիկ Թևանյանը։

Պատգամավորն ընդգծեց, որ ՔՊ այն անդամները, որոնք պշտպանում են Նիկոլ Փաշինյանի տեսակետները, չգիտեն, որ իրենք անհատական պատասխանատվություն են կրելու  իրենց դիրքորոշման համար:

«Մեզանում պատրաստվում է մի նոր Տիխոնովսկայա, որը հետագայում կարող է մի երկրում հանգրվանել, իր անձնական անվտանգությունն ապահովել, իսկ թե ինչ կլինի երկրի հետ, այդ տնաբույծ Տիխոնովսկայային չի հետաքրքրում: Սա է ամենամեծ վտանգը»,-ասաց Անդրանիկ Թևանյանը՝  նշելով, որ քվեարկությունից հանել են՝ Ադրբեջանի կողմից Լաչինի միջանցքի շրջափակումը դատապարտող ընդդիմության հայտարարության նախագիծը.

«Դա միջազգային խայտռակություն կլիներ, որ Հայաստանի ԱԺ-ն պաշտպնում է Ադրբեջանի դիրքորոշումը, եթե հայտարարությունը կողմ ձայներ չի հավաքում»։

Ընդդիմադիր պատգամավորը վստահեցրեց, որ տեքստը կլրամշակեն ու նորից կներկայացնեն։

Մանրամասն՝ տեսանյութում։