ՆԳ նախարարությունը ստեղծված է, հիմա դե յուրե դրա ձևավորման փուլում է․ Փաշինյան

Կառավարության որոշմամբ ձևավորվելիք Ներքին գործերի նախարարության ենթակայությանը կհանձնվեն Ոստիկանությունը, Փրկարար ծառայությունը և Միգրացիայի և քաղաքացիության ծառայությունը՝ ըստ այդմ ուժը կորցրած ճանաչելով Արտակարգ իրավիճակների նախարարությանը վերաբերող ենթակետը և Միգրացիոն ծառայությանը վերաբերող պարբերությունը: Այս մասին այսօր կառավարության  նիստում հայտարարեց արդարադատության նախարար Գրիգոր Մինասյանը:

Վարչապետ Նիկոլ Փաշինյանն իր հերթին ասաց, թե Ներքին գործերի նախարարությունը ստեղծված է, հիմա դե յուրե դրա ձեւավորման փուլում են:

«Հաջորդ շաբաթ արդեն նախարար ու փոխնախարարներ կնշանակենք: Մինչ այդ, մենք այս որոշումը կայացնում ենք մեծ պատկերով նախարարության կառուցվածքը հաստատելու համար», - նշեց վարչապետը՝ հավելելով, որ ՀՀ ներքին գործերի նախարարության ենթակայությանը են հանձնվում ոստիկանությունը Փրկարար ծառայությունը և Միգրացիայի ու քաղաքացիության ծառայությունը։