Չի բացառվում, որ Փաշինյանը ելուզակներին ուժայինի հագուստ հագցնի և մտցնի Գլխավոր շտաբ. Լարիսա Ալավերդյան

Մենք ունենք սահմանադրություն, որը մեր գլխավոր օրենքն է և դրա նորմերի ուժով Օնիկ Գասպարյանը որևէ խնդիր չուներ պաշտոնավարումը շարունակելու առումով: Այս մասին մեզ հետ զրույցում ասաց ՀՀ առաջին ՄԻՊ, իրավապաշտպան Լարիսա Ալավերդյանը՝ անդրադառնալով Օնիկ Գասպարյանի շուրջ ստեղծված իրավիճակին:

«Շատ իրավաբաններ են մատնանշել այն կարգավորումները, ըստ որոնց ԳՇ պետ-ին պաշտոնանկ անելու որևէ լիազորություն չկա, ինձ ուղղակի զարմացնում են վարչապետի աշխատակազմից այսպես կոչված որոշ մեկնաբանություններ, այնպիսի տպավորություն է, թե մենք իրավաբան չունենք, կարծես մենք անկիրթ ցեղերից բաղկացած ինչ-որ ժողովուրդ ենք, այդպես չէ, մենք ունենք շատ լավ զարգացած իրավաբանական դպրոց:

Ինչ վերաբերում է ՀՀ նախագահի դիրքորոշմանը, ես հուսով եմ, որ ՀՀ նախագահը զերծ կմնա ինչ-ինչ փնտրտուքներից և կգնա սահմանադրական ճանապարհով, անգամ եթե նախագահը ինչ-որ սխալներ է գործել, կամ գրանցման հետ կապված ինչ-որ խնդիր է եղել, բայց եթե այսօր ՀՀ նախագահը գնա իրավական ճանապարհով, նրան ամեն ինչ կներվի, հակառակ դեպքում կնշանակի, որ իր անվան հետ կապվող բոլոր քննադատություններն ու մեղադրանքները ճիշտ են»,-ասաց Լարիսա Ալավերդյանը:

Անդրադառնալով իշխանության հետագա քայլերի օրինականությանը, իրավապաշտպանը նշեց. «Այսօրվա իշխանությունն ամեն ինչ անում է ուժային բախումների տանելու համար, բայց  պաշտոնյաները թող հիշեն, որ անօրինական հրամանները չեն կատարում, վերջին կարմիր գիծը չպետք է անցնել, մի քանիսը արդեն իսկ հատված են, լինի դա ԱԱԾ-ն, Ոստիկանությունը, թե այլ կառույց, որևէ մեկը չպետք է ուժով գնա մեր Գլխավոր շտաբի դեմ, դա կարող են անել միայն Ադրբեջանն ու Թուրքիան, չպետք է հերթական անգամ ապացուցել, որ այս իշխանությունը իրականացնում են Թուրքիայի և նրա կցորդ Ադրբեջանի քաղաքականությունը: Չեմ կարծում, որ մեր Զինված ուժերում կարող են գտնվել նման մարդիկ, բայց ծանոթ լիենլով Փաշինյանի մեթոդներին, նա կարող է հագցնել հագուստ, և այդ ելուզակներին, որոնք պատրաստ են կատարել ցանկացած հանցագործություն, ուղարկել»:

Իշխանության նպատակը քաոս ստեղծելն է, ես հուսով եմ, որ ԳՇ-ն և բոլոր նրանք, ովքեր գիտեն երկրի և պետության գինը, կկարողանան ամեն ինչ լուծել հնարավոր քիչ կորուստներով, իսկ նոր ԳՇ պետի նշանակումը հնարավոր չէ, քանի որ իրավական առումով Օնիկն ու մյուսները պետք է շարունակեն պաշտոնավարումը:

Անդրադառնալով Արտակ Դավթյանի պաշտոն ստանալուն հանգամանքին՝ Լարիսա Ալավերդյանն ասաց.

«Արտակ Դավթյանին ամբողջովին ուզում են դարձնել հանցակից բոլոր տեսակի հանցագործություններում, որոնք ուղղված են պետության և սահմանադրության դեմ, բայց Արտակ Դավթյանը ինքնը պետք է որոշի իր ապագան»: