Աննա Դանիբեկյանը հետաձգեց պաշտպանական կողմի միջնորդության լուծումը

Երևանի ընդհանուր իրավասության դատարանը՝ նախագահությամբ դատավոր Աննա Դանիբեկյանի, հետաձգեց պաշտպանական կողմի միջնորդության լուծումը մինչև գործի համար էական հանգամանքների ի հայտ գալը:

«Դատարանը չի հեռանում խորհրդակցական սենյակ և արձանագրում է, որ միջնորդությունների լուծումը հնարավոր չէ տվյալ պահին, մինչև գործի համար էական հանգամանքների ի հայտ գալը», - հայտարարեց դատավոր Դանիբեկյանը։

Դատարանը գտել է, որ միջնորդությունների լուծումը պետք է հետաձգվի, հաշվի առնելով այն հանգամանքը, որ այս պահին Վճռաբեկ դատարանի վարույթում է գտնվում պաշտպանական կողմի բողոքը Վերաքննիչ դատարանի որոշման դեմ, որով բեկանվել էր Երևանի ընդհանուր իրավասության դատարանի՝ գործի վարույթը կասեցնելու և ՍԴ դիմելու որոշումը։

Բացի այդ, դատարանը հաշվի է առել այն հանգամանքը, որ ներկա պահին ՍԴ-ում քննության առարկա է հանդիսանում ՀՀ Քր․ Օր․-ի 300․1 հոդվածի սահմանադրականության հարցը, որին իր միջնորդության մեջ անդրադարձել է նաև պաշտպան Կարեն Մեժլումյանը։

Պաշտպանական կողմն առարկեց, խնդրելով պարզաբանել դատարանի որոշումը, սակայն դատարանը հարկ չհամարեց դա անել։

Այս պահին դատական նիստն ընդմիջվել է։