16 09 2019

Ոստիկանության արձագանքը՝ «1-in.am»-ի իր դեմ ուղղորդված հոդվածներին

Ոստիկանության արձագանքը՝ «1-in.am»-ի իր դեմ ուղղորդված հոդվածներին

«1-in.am» լրատվական կայքում հրապարակվել է «Ոստիկանությունը պարալիզացվել է, շտապ լուծումներ են պետք, միայն Օսիպյանի հեռանալը չի փրկի» վերտառությամբ հոդված: Այս մասին հայտնում են ՀՀ ոստիկանության լրատվական բաժնից:

Հոդվածում հերթական անգամ անդրադարձ է կատարվում ոստիկանությունում իբրև թե անգործության և անհամարժեքության երևույթներին:

Նախ, Շինարարների 25 հասցեում ս/թ սեպտեմբերի 8-ին տեղի ունեցած դեպքի առնչությամբ ոստիկանությունը իրականացրել է բոլոր անհետաձգելի գործողությունները, պարզվել է ենթադրյալ իրավախախտում կատարողի անձը, շարունակվում են իրականացվել որոնողական աշխատաքներ: Դեպքի մասին ոստիկանությունը տվյալներ ստացել է օրենքով նախատեսված աղբյուրներից:

Բազմիցս հայտարարել ենք, որ ֆեյսբուքյան օգտատերերի հաղորդումները քրեական գործ հարուցելու օրինական առիթներ չեն հանդիսանում, և դրանց հիման վրա ոստիկանությունը քրեադատավարական գործողություններ չի իրականացնում: Օգտատերերի ֆեյսբուքյան հրապարակումները՝ որպես հանցագործության մասին տեղեկություններ, ունեն բացառապես կողմնորոշիչ նշանակություն: Անկախ որևէ օգտատիրոջ պաշտոնից կամ ինքնագնահատականի աստիճանից, ոստիկանությունը դրանց բոլորի նկատմամբ դրսևորում է հավասար վերաբերմունք, և օրինակ՝ պատգամավոր-օգտատիրոջ հրապարակած տեղեկույթը չի նույնացնում Ազգային ժողովից ստացված հանցագործության մասին պաշտոնական հաղորդման հետ:

«Պարալիզացված» ոստիկանությունն այսօր բացահայտում է գրանցված հանցագործությունների 50 տոկոսից ավելին, մինչդեռ զարգացած երկրներում այդ թիվը չի գերազանցում 25-30 տոկոսը: Հանցագործությունների բացահայտման արդյունավետության վրա պետական իրավապահ մարմնի ղեկավարի հարիզմը չի ազդում, ինչպես օրինակ՝ միջնադարյան «գաղտնի» ոստիկանություններում էր կամ երրորդ ռեյխում: Ինչպիսին էլ լինի հետավտորիտար քաղաքական համակարգը, ոստիկանությունը քաղաքացու և ոչ թե համակարգի կողքին է, հատկապես՝ հիմա, երբ գործող քաղաքական համակարգը առավել քան լեգիտիմ է:

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ