Քոչարյանի կալանավորումը տեղի չի ունեցել արդարության ու օրինականության սկզբունքի վրա. Զարուհի Փոստանջյան

Ռոբերտ Քոչարյանի կալանավորումը տեղի չի ունեցել օրինականության սկզբունքը պահպանելու հիման վրա: Այս մասին Երևանի ընդհանուր իրավասության դատարանի Շենգավիթի նստավայրում լրագրողների հետ զրույցում ասաց «Երկիր Ծիրանի» կուսակցության ղեկավար և իրավաբան Զարուհի Փոստանջյանը:

«Քաղաքացիները պետք է գիտակցեն, որ նախնական կալանավորումը դա դեռ պատիժ չէ ազատազրկման ձևով, և այս բոլոր նախնական կալանավորումներն իրենց մեջ պարունակում են ոչ թե արդար նպատակներ, այլ ընդհակառակը՝ բեմադրություններ են ներկայացնում: Արդեն ութ ամիս է անցել, այսպես կոչված, հեղափոխությունից, իսկ ես կասեի՝ տեղափոխությունից, և այդ գործերը պետք է արդեն լինեին դատարանում ծանրակշիռ մեղադրական եզրակացություններով», - ասաց նա, հավելելով, որ նման եզրակացություններ չկան:

 Զարուհի Փոստանջյանն իր խոսքում նշեց նաև, որ Քոչարյանի գործի մանրամասներին տեղյակ չէ, բայց ըստ նրա նախնական կալանավորումը բացառիկ միջոց է, որին պետք է դիմել միայն բացառիկ պայմաններում:

 «Տվյալ պարագայում մենք հասկանում ենք, որ այդ նախնական կալանավորումները գործող իշխանություններն օգտագործում են իրենց քաղաքական շահերը հետապնդելու համար: Դա ցուցադրում են քաղաքացիներին որպես պատժի տեսքով միջոց, իսկ քաղաքացիները պետք է հստակ տարանջատեն՝ նախնական կալանավորումը՝ դա ազատազրկման ձևով պատիժ չէ», - ասաց նա:

Զարուհի Փոստանջյանը նաև անդրադարձավ երեկ տեղի չունեցած դատական նիստին, որը պետք է քններ իր հողմից հանցագործության մասին ներկայացված հաղորդումը՝ ՀՀ նախկին նախագահ Սերժ Սարգսյանի ու ՀՀԿ-ի կողմից ապօրինությունների վերաբերյալ: Ըստ Փոստանջյանի դա վկայում է այն մասին, որ Սերժ Սարգսյանը շարունակում է մնալ որպես իշխանություն, իսկ Նիկոլ Փաշինյանը շարունակում է համագործակցել Սերժ Սարգսյանի հետ, որովհետև այդ եզրույթը՝ «Նիկոլը ճիշտ էր, ես՝ սխալ», դա հենց այդ համագործակցության մասին է խոսում»:

Զարուհի Փոստանջյանը նաև ընդգծեց, որ այսօր Նիկոլ Փաշինյանի ձեռքերում կենտրոնացված են մեծ լծակներ և դրանք նա օգտագործում է, ինչ ակնհայտ դարձավ գաղտնալսումների ժամանակ: