Դատավորը Մասիսի քաղաքապետի կամքին հակառակ հանրային պաշտպան է ներգրավել և երկարացրել կալանքի ժամկետը

Մասիսի քաղաքապետ Դավիթ Համբարձումյանի փաստաբան Տիգրան Աթանեսյանը ֆեյսբուքյան իր էջում գրառում է արել՝ նշելով, որ դատավոր Մնացական Մարտիրոսյանը Մասիսի քաղաքապետի կամքին հակառակ ներգրավել է հանրային պաշտպան և երկարաձգել կալանքը։

«Դատավոր Մնացական Մարտիրոսյանը խախտելով Սահմանադրության, Կոնվենցիայի և քրեական դատավարության բոլոր վերաբերելի նորմերը, Մասիսի քաղաքապետ Դավիթ Համբարձումյանի կամքին հակառակ ներգրավել է հանրային պաշտպան և առանց պաշտպանության կողմի ներկայության որոշում է կայացրել կալանքի ժամկետը երկարացնելու մասին։ Նման խայտառակ և բացահայտ ապօրինություն դժվար էր պատկերացնել Նոր Հայաստանում, սակայն դա արդեն փաստ է։ Ակնհայտ է նաև, որ նման ապօրինություն կարող էր տեղի ունենալ միայն իրավապահ ողջ համակարգի համատեղ ջանքերով։ Կարծում եմ, ամեն ինչ առավել քան պարզ է։ Օրենքը և արդարադատությունը այստեղ պարզապես բացակայում են, իսկ տեղի ունեցողը մի օր պետք է դառնա առանձին քննության առարկա»,– գրել է նա։

Հիշեցնենք, որ oգոստոսի 30-ին Երևանի ընդհանուր իրավասության դատարանում դատավոր Մնացական Մարտիրոսյանի նախագահությամբ մեկնարկել էր Մասիսի քաղաքապետ Դավիթ Համբարձումյանի նկատմամբ խափանման միջոց ընտրված կալանավորման ժամկետը երկարացնելու վերաբերյալ միջնորդության քննությունը, որը հետաձգվել էր Դավիթ Համբարձումյանի չներկայանալու պատճառով։