Դավիթ Համբարձումյանի կալանավորման ժամկետը երկարաձգելու քննությունը հետաձգվել է

Օգոստոսի 30-ին Երևանի ընդհանուր իրավասության դատարանում դատավոր Մնացական Մարտիրոսյանի նախագահությամբ մեկնարկել է Մասիսի քաղաքապետ Դավիթ Համբարձումյանի նկատմամբ խափանման միջոց ընտրված կալանավորման ժամկետը երկարացնելու վերաբերյալ միջնորդության քննությունը, որը հետաձգվել է: Այս մասին ֆեյսբուքյան իր էջում տեղեկացրել է Դավիթ Համբարձումյանի պաշտպաններից Տիգրան Աթանեսյանը:

«Դավիթ Համբարձումյանի կալանավորման ժամկետի երկարացման դատական նիստը հետաձգվեց մինչ վաղը՝ ժամը 17:00-ն՝ նրա մասնակցությունը ապահովելու, ինչպես նաև պաշտպաններիս կողմից դատավոր Մնացական Մարտիրոսյանին ինքնաբացարկի միջնորդություն ներկայացնելու համար»,- գրել է Աթանեսյանը:

Փաստաբանը հայտնել է նաև, որ Դավիթ Համբարձումյանը հրաժարվել է դատական նիստին ներկայանալուց, քանի որ նիստը նախագահում է Մնացական Մարտիրոսյանը։

Հիշեցնենք, որ 2018 թվականի ապրիլի 22-ին Հայանիստ-Հովտաշատ գյուղերի խաչմերուկում տեղի ունեցած միջադեպի փաստով մեղադրանք է առաջադրվել Դավիթ Համբարձումյանին, մեղադրանք է առաջադրվել նաև ապրիլի 22-ին Էրեբունի վարչական շրջանում տեղի ունեցած զանգվածային անկարգությունների փաստով, գործերը մեկ վարույթում են: