Առողջապահության նախարարությունը՝ երեխաների շրջանում նկատվող աղիքային վարակների մասին

Այս օրերին ծնողների կողմից տարբեր ահազնագեր են հնչում, որ երեխաների մոտ նկատվում են միանման ախտանշաններ՝ բարձր ջերմություն, թուլություն, փորլուծություն: Կա հիվանդանոցներ դիմելիության աճ: Իրավիճակի մասին առավել մանրամասներ իմանալու համար դիմեցինք Առողջապահության նախարարություն:

Նախարարի մամուլի խոսնակ Լիանա Եղիազարյանը մեզ հետ զրույցում նշեց, որ ամռան ամիսներին ամեն տարի արձանագրվում է աղիքային վարակներով պայմանավորված սեզոնային ակտվություն, սա սեզոնին բնորոշ ակտիվացում է, համաճարակի մասին խոսք լինել չի կարող: Նրա խոսքով իրավիճակը մշտապես գտնվում է առողջապահության նախարարության ուշադրության կենտրոնում:

«Նախարաությունը մշտապես հանդես է գալիս հորդորով՝ պահպանել սննդամթերքի պահպանման կանոնները, չօգտվել կրեմային հրուշակեղենից, չօգտագործել պաղպաղակ, մրգերը չհամադրել պաղպաղակի հետ»,- ասաց նա:

Նա բացառեց ծնողների մտահոգությունը, որ նման խնդիրենրի պատճառը կարող է ջուրը լինել, քանի որ փորձաքննության արդյունքները որևէ խնդիր չեն արձանագրել: Նա նշեց նաև, որ որպես աղիքային վարակի առաջացման պատճառ որոշ ծնողներ համարում են կոնկրետ կաթնամթերքի արտադրատեսակ, այս դեպքում Լիանա Եղիազարյանը հորդորեց ծնողներին դիմել սննդի անվտանգության պետական ծառայություն՝ սննդի փորձաքննություն իրականացնելու համար:

Մենք հետաքրքվեցինք, թե արդյոք նախարարությունը իրազեկման գործողություններ իրականացրել է նախադպորցական հաստատություններում, թե ոչ՝ Լիանա Եղիազարյանը նշեց, նախարարությունը վերահսկողական գործառույթ չունի, բայց օրեր առաջ հորդոր-զգուշացում է ուղարկվել Քաղաքապետարան, Կրթության նախարարություն, որպեսզի վերահսկողությունը նախադպրոցական հաստատություններում ուժեղացնեն սեզոնի հետ կապված:

Նշենք նաև, որ օրեր առաջ «Գուլիվեր» մանկապարտեզի մի քանի սաների առողջական վիճակը վատացել էր: Բժշկական օգնության էր դիմել 18 երեխա միևնույն նախանշաններով՝ փսխում, փորլուծություն, բարձր ջերմնություն, թուլություն: Լաբորատոր անալիզների արդյունքներով, նրանցից 9-ի մոտ հայտնաբերվել էր դիզենտերիայի հարուցիչ՝ շիգելա զոնե:

Նախադպրոցական հաստատությունում հետազոտությունները սանիտարական և հիգիենիկ նորմերի կոպիտ խախտումներ են ի հայտ բերել, մասնավորապես, խոհանոցում, որը սննդի երկրորդային աղտոտման պատճառ է դարձել: Խախտումները վերացնելու և վարակի տարածման կանխարգելման համար մանկապարտեզի աշխատանքը ժամանակավորապես դադարեցվել է:

Լիանա Եղիազարյանը նաև նշեց, որ այս օրերին նկատվող ակտիվացումները պետք չէ դիտարկել որպես դիզենտերիա: Ստամոքս-աղիքային ոչ բոլոր դեպքերն են դիզենտերիա: