Եվս 30 ֆուտբոլիստ բանակ չի գնա

Կառավարությունն իր ապրիլի 11-ի նիստում ընդունեց «Սպորտի բնագավառում նշանակալի նվաճումներ ունեցող քաղաքացիներին պարտադիր զինվորական ծառայության զորակոչից տարկետում տալու կարգը եւ պայմանները սահմանելու մասին»  որոշման հավելվածում փոփոխություններ կատարելու որոշման նախագիծը:

Ըստ հիմնավորման` որոշման նախագծի ընդունումը պայմանավորված է այն հանգամանքով, որ՝ Ֆիզիկական կուլտուրայի եւ սպորտի շարունակական զարգացման, մարզիկների մարզական վարպետությունը բարձրացնելու, ֆուտբոլ մարզաձեւը Հայաստանում զարգացնելու համար անհրաժեշտ է Հայաստանի Հանրապետությունում ֆուտբոլի  ազգային հավաքական թիմերը համալրել բարձրակարգ ուժեղագույն մարզիկներով՝ Եվրոպայի եւ աշխարհի փուլային ընտրական առաջնություններին լավագույն ձեւով հանդես գալու եւ մեր երկրի պատիվը բարձր պահելու նպատակով:

Ֆուտբոլի երիտասարդների եւ մեծահասակների հավաքական թիմերից յուրաքանչյուրի կազմում ընդգրկված են 11 մարզիկներ՝ իրենց փոխարինողներով, յուրաքանչյուր տարիքային խմբում՝ ընդամենը 22 մարզիկ։

Այսպիսով` նպատակահարմար է ֆուտբոլի նշված տարիքային հավաքական թիմերում ընդգրկված մարզիկներից տարեկան (ամառային եւ ձմեռային զորակոչեր) տարկետում տալ 22 մարզիկների փոխարեն 30 մարզիկների։