Իշխանության վերարտադրվելու հնարավորության պարագայում մեր երկիրն ու ժողովուրդը ողբերգական վիճակում են հայտնվելու․ «Փաստ»

«Հավանական արտահերթ ընտրություններին ընդառաջ քաղաքական դաշտը վերակազմավորվում է, ստեղծվում են դաշինքներ, հստակեցվում են քաղաքական ուժերի կողմնորոշումներն ու մոտեցումները: Կառավարման խորհրդատու Բաբկեն Մկրտչյանը կարծում է, որ ընդդիմադիր դաշտը պետք է համախմբվածություն դրսևորի, սթափ և առողջ պետք է լինի ու հասկանա, թե իրենց միջից որն է ամենակարող ուժն ու առաջնորդը, որը կարող է ճիշտ կառավարման տարբերակով երկիրը հանել այս անդունդից:

«Եթե ընտրությունների արդյունքում այս իշխանությունը հեռացվում է, և փորձառու, պատրաստ, բանիմաց ուժի ներկայացուցիչների թիմ է ընտրվում, այդ դեպքում, անշուշտ, կարելի է լուծել ճգնաժամը: Բոլորը միասին շատ գրագետ, ճիշտ շեշտադրումներով, հստակ ծրագրերով պետք է լծվեն ընտրապայքարի ընթացքին»,- «Փաստի» հետ զրույցում ասաց Մկրտչյանը՝ հավելելով, որ այս իշխանության վերարտադրվելու հնարավորության պարագայում մեր երկիրն ու ժողովուրդը ողբերգական վիճակում են հայտնվելու:

Մկրտչյանը կարծում է, որ վերարտադրվելու համար իշխանությունները որոշակի քայլեր կանեն՝ վարչական ռեսուրսի կիրառում, ընտրակաշառքին մոտ երևույթներ (ասֆալտ, պարարտանյութ, աջակցության ծրագրեր): «Գուցե ոմանք կընկնեն այդ ծուղակի մեջ ու կընտրեն նրանց, բայց առավելագույնը 25-30 տոկոսի մասին է խոսքը, ինչով կավարտվի իրենց քաղաքական ճակատագիրը ու, կարծում եմ, կսկսվի քրեական ճակատագիրը»,- ասաց Մկրտչյանը»,-գրում է թերթը։

Նյութն ամբողջությամբ կարդացեք թերթի այսօրվա համարում։