Ասֆալտի թեման արդեն անցյալում է․ «Հրապարակ»

«Տարածքային կառավարման և ենթակառուցվածքների նախարար Սուրեն Պապիկյանն ակտիվ մարզային շրջայցերի մեջ է։ Նրա ֆեյսբուքյան էջում ամեն օր մի տեսանյութ ու հաղորդագրություն է տեղադրվում՝ այսինչ համայնքում նոր ջրանցքի կառուցման, այնինչ գյուղում հին ջրանցքի նորոգման, երրորդում՝ մանկապարտեզի կառուցման մասին։ Պապիկյանը հանրապետության քարուքանդ եղած ճանապարհներով մարզեր է մեկնում երկու նպատակով․ առաջինը նախընտրականն է։

Ակնհայտ է, որ փաշինյանական ողջ թիմն արդեն ակտիվորեն, օրենքի բացահայտ խախտումով, սկսել է քարոզարշավը՝ ադմինիստրատիվ ռեսուրսի լայն կիրառմամբ, աշխատանքային այցերի անվան տակ։ Եվ հիմնական բեռը դրված է Պապիկյանի ուսերին․ նա շտաբի պետն է լինելու և պատասխանատու է քարոզարշավի և Փաշինյանի միտինգներին հանդիսատես ապահովելու համար։

Երկրորդ նպատակն այն է, որ Պապիկյանի նախարարությունը որոշել է, որ ասֆալտով այլևս հնարավոր չէ «փիառվել», քանզի հանրությունն իրենց ընկալում է սոսկ որպես «ասֆալտ անող իշխանություն», և ասֆալտն էլ արդեն հիմնովին քայքայվել է՝ ոչնչացնելով «որակյալ ասֆալտ» անող իշխանությունների մասին փչվող փուչիկը։ Ուրեմն ժամանակն է ջրագիծ ու մանկապարտեզ «կառուցելու»։

Իսկ ասֆալտն արդեն կոնկրետ եկամուտ բերող գործ է դարձել նրանց համար՝ տենդերները յուրայիններին բաշխելու, նախկինից էլ ավելի մեծ ծավալով ատկատներ վերցնելու լայն հնարավորություններով։ Ուստի ասֆալտով ընտրություններում հաղթելն անհնարին է, և դա է պատճառը, որ ասֆալտի մասին այլևս չեն խոսում, անցել են այլ թեմաների»,-գրում է թերթը:

Նյութն ամբողջությամբ կարդացեք թերթի այսօրվա համարում: