Ընտրական օրենսգիրքը հարմարեցրին ՔՊ-ին․ «Հրապարակ»

«Շաբաթ օրը Նիկոլ Փաշինյանն այցելել է ԱԺ, հանդիպել «Իմ քայլը» խմբակցության հետ: Թեև հանգստյան օր էր, բայց ԱԺ-­ում են հանդիպել, ոչ թե կուսակցութ­յան գրասենյակում, որ լրագրողների աչքից հեռու լինեն: Օրակարգում եղել է Ընտրական օրենսգիրքը:

Խմբակցությունը տեղեկացվել է, որ ԸՕ նախագիծը պատրաստ է, եկող շաբաթ կուղարկվի Վենետիկի հանձնաժողով: Քննարկել են ԸՕ փո­փոխությունները և թիմին արտա­հայտվելու հնարավորություն են տվել: Այսպիսով՝ նոր նախագծով փոխվել է ընտրությունների մոդելը, ռեյտինգային համակարգ, որպես այդպիսին, չի լինի, բայց դրա այլընտրանքային տարբերակը կլինի, համամասնական ընտրակարգ՝ բաց ցուցակներով: Սա ենթադրում է, որ ռեյտինգային թեկնա­ծուներ կլինեն, բայց քվեարկությունը կգործի ողջ հանրապետությունով մեկ:

Ընտրողին կներկայացվի մեկ ցուցակ, բայց նա կկարողանա այդ ցուցակում նախապատվություն տալ իր թեկնածուին: Այսինքն՝ իքս թեկնածուն, լինելով համամասնական ցուցակի 100-րդ հորիզոնականում, ստացած ձայների շնորհիվ կարող է բարձրանալ վեր և հակառակը: Սակայն Վենետիկ կուղարկվի փակ համամասնական տարբերակը, Փա­շինյանն ասել է՝ մի մտահոգվեք, Վենետիկի համար տարբերություն չկա՝ հա­մամասնական ընտրությունները բաց, թե փակ ցուցակներով են ընթանալու: Երբ գա ժամանակը՝ նայած անհրա­ժեշտության, կանեն բաց ցուցակնե­րով, հատկապես, որ առաջարկն արվել է ԼՀԿ-ի կողմից: Կարծիքներ են հնչել, որ եթե չլինի վարկանիշային քվեարկություն, ցուցակի միայն առա­ջին 20 համարը կաշխատեն, իսկ Փաշինյանը չունի 2018-ի վարկանիշը, որ ուսերին բազմած՝ մտնեն ԱԺ: Ինչ վե­րաբերում է անցողիկ շեմին, կուսակ­ցությունների դեպքում՝ 4 տոկոս, դա­շինքների դեպքում կբարձրանա 8-ի:

«Չպետք է խրախուսենք դաշինքնե­րի ձևավորումը»,- ասել է Փաշինյանը: Ավելին՝ գործող կարգով՝ ԱԺ-ն առնվազն 3 ուժից պետք է կազմված լիներ, եթե անցնում էին 2-ը, երրորդն ինքնաբերաբար էր մտնում, հիմա դարձել է 4: Հանվել է հետընտրական կոալիցիա կազմող կուսակցություննե­րի թվի սահմանափակումը, նախկի­նում 3 էր, նորով սահմանափակում չկա, և 3 շաբաթ ժամանակ ունեն: Արտահերթ ընտրությունների մասով էլ Փաշինյանն ասել է՝ հնարավոր է աշնանն անցկացվեն՝ կախված ԲՀԿ-ի և ԼՀԿ-ի համաձայնությունից»,-գրում է թերթը:

Նյութն ամբողջությամբ կարդացեք թերթի այսօրվա համարում: