Իշխանությունները փակուղու առաջ են․ «Փաստ»

«Փաստ» թերթը գրում է. «Հայաստանի իշխանությունը դատաիրավական համակարգի, հատկապես ՍԴ-ի հետ կապված՝ փաստացի կանգնած է փակուղու առաջ, և հասկանալի չէ, թե ի վերջո ինչ լուծման են հանգելու։ «Փաստ» թերթի տեղեկություններով՝ ՍԴ-ի «փակուղին» օրակարգային է դարձել իշխանությանը սատարող «հասարակական սեկտորի» համար, այդ իսկ պատճառով նրանք ձեռնամուխ են եղել այս թեման միջազգային հարթակներում շահարկման առարկա դարձնել։ Առավել ակտիվ է քաղհասարակության այն սեգմենտը, որը գլխավորապես իր ֆինանսական աջակցությունը ստանում է դրսից։ Ի դեպ, թերթին տեղեկություններ են փոխանցվել, որ այս ամենը տեղի է ունեցել ՀՀ քաղաքական իշխանության հորդորով, որպեսզի ՍԴ վերաբերյալ իշխանությունների «սրտից» դիրքորոշումներ կորզվեն նաև եվրոպական ընտանիքի ՀԿ-ներից։

Մասնավորապես, օրերս հայտնի դարձավ, որ «հասարակական սեկտորի» որոշ ներկայացուցիչներ, որոնք մասնակցել են ԵՄ ԱլԳ քաղհասարակության հերթական համաժողովին, ՍԴ հարցը բարձրացրել են ֆորումի ժամանակ, ավելին՝ հասել նրան, որ այդ համաժողովում ՍԴ գործընթացները ներկայացվեն և որակվեն որպես «իրավական ճգնաժամ»: Այնուհետև համաժողովի ժամանակ ՀՀ իշխանություններին կոչ է հղվել՝ «այդ ճգնաժամին համապատասխան իրավակարգավորում տալ և ստեղծել լեգիտիմ ՍԴ»։ Հավելենք, որ հիշյալ համաժողովին մասնակցել են Եվրամիության և Արևելյան գործընկերության վեց պետությունների քաղհասարակության 1000-ին մոտ կազմակերպություններ»:

Նյութն ամբողջությամբ կարդացեք «Փաստ»-ում։