ԱՅՍ ՊԱՀԻՆ I ՈւՂԻՂ I Արցախի թեմայով ասուլիս՝ Եվրոպական խորհրդարանում

Այսօր՝ նոյեմբերի 7-ին, Եվրոպական խորհրդարանում կանցկացվի «Արցախահայության իրավունքները և Եվրոպական միությունը» խորագրով խորհրդաժողով։ Այն տեղի է ունենում Եվրոպական խորհրդարանի կիպրացի պատգամավոր Կոստաս Մավրիդեսի հրավերով, ՀՅԴ Հայ դատի Եվրոպայի գրասենյակի ու «Եվրոպացիները հանուն Արցախի» նախաձեռնության համագործակցության արդյունքում։

Խորհրդաժողովին հրավիրված են միջազգային ճանաչում վայելող նշանավոր բանախոսներ։ Մասնավորապես՝ Միջազգային քրեական դատարանի նախկին գլխավոր դատախազ Լուիս Մորենո Օկամպոն, Ցեղասպանության կանխարգելման Լեմկինի ինստիտուտի համահիմնադիր և իրավական հարցերով տնօրեն Վիկտորիա Մասիմինոն և միջազգային իրավունքի հայազգի մասնագետ Գառնիկ Քերքոնյանը։ Նախատեսվում է, որ նրանք կանդրադառնան Արցախում տեղի ունեցած վերջին զարգացումներին և Արցախի բնիկ հայ բնակչության իրավունքներին:

Խորհրդաժողովի նպատակն է քննարկել ստեղծված իրավիճակի հաղթահարման ուղիները, 2020թ․ պատերազմից հետո Արցախում տեղի ունեցած իրադարձությունները միջազգային իրավունքի, առհասարակ մարդու իրավունքների տեսանկյունից, ինչպես նաև անդրադառնալ միջազգային հանրության, հատկապես հակամարտության բանակցային գործընթացում ներգրավված ուժերի քաղաքական վարքին՝ հատուկ ուշադրություն դարձնելով ԵՄ քաղաքական դերին։

Այս պահին Բրուսելի մամուլի ակումբում տեղի է ունենում ասուլիս՝ խորհրդաժողովի բանախոսների և ՀՅԴ Հայ դատի Եվրոպայի գրասենյակի նախագահ Գասպար Կարապետյանի մասնակցությամբ: Մամուլի ասուլիսին հրավիրված են եվրոպական երկրներում գործող լրատվական միջոցների թղթակիցներ ու անհատ լրագրողներ, ինչպես նաև եվրոպական ուղեղային կենտրոնների (think-thank) ներկայացուցիչներ:

Ասուլիսն առաջարկում ենք դիտել ուղիղ հեռարձակմամբ։