12  05  2019

ՏՏ ոլորտի աճի մասին Փաշինյանի ու ԱՎԾ թվերը տարբեր են. Tert.am

ՏՏ ոլորտի աճի մասին Փաշինյանի ու ԱՎԾ թվերը տարբեր են. Tert.am

«Հայկական Ծրագրեր» ընկերության նախագահ Աշոտ Խաչատրյանն իր ֆեյսբուքյան էջում գրել է, որ ՀՀ վարչապետ Նիկոլ Փաշինյանի ներկայացրած 100 փաստերից 39-երորդը 10.5 միլիոն ԱՄՆ դոլար ֆինանսավորում է ստացել և մեկնարկել է «Ինժեներական քաղաք» ծրագիրը:

«2018 թվականին ակտիվ գործող ՏՀՏ ընկերությունների թիվը հասել է շուրջ 800-ի՝ ապահովելով 23 տոկոս աճ 2017 թվականի համեմատ: 2018թ. Հայաստանի ծրագրավորման և ծառայությունների ոլորտի շրջանառությունը կազմել է մոտ 730 միլիոն ԱՄՆ դոլար, համակցված տարեկան աճը կազմել է 28 տոկոս, 2018թ. ՏՀՏ ոլորտում զբաղվածների թիվը հասել է 19.552-ի, ինչի արդյունքում մոտ 27 տոկոս աճ է արձանագրվել 2017թ.-ի համեմատ, չի համապատասխանում իրականությանը»,-նշել է նա:

Վերջինս նաև մասնավորեցրել է. «Նիկոլ Փաշինյանն ասում է՝ 2018թ. Հայաստանի ծրագրավորման և ծառայությունների ոլորտի շրջանառությունը կազմել է մոտ 730 միլիոն ԱՄՆ դոլար, համակցված տարեկան աճը կազմել է 28 տոկոս, 2017 թվականի համեմատ։

Մինչդեռ ըստ ազգային վիճակագրական ծառայության տվյալների՝ ՏՀՏ աճը կազմել է 4,7 տոկոս։ Իսկ ծրագրավորման և ծառայությունների ոլորտի աճը կազմել է 14 տոկոս, ընդ որում ոչ թե 730 միլիոն ԱՄՆ դոլար, այլ 180 միլիոն ԱՄՆ դոլար: Այդ 14 տոկոս աճի մեծ մասն, էլ արտոնություններ ստացած և հարկերից խուսափելու սխեմաներ աշխատեցնող ընկերությունների հաշվին է»:

Ինֆորմացիոն տեխնոլոգիաների ձեռնարկությունների միության նախագահ Կարեն Վարդանյանը մինչդեռ Tert.am-ի հետ զրույցում նշեց, որ Ազգային վիճակագրական ծառայությունն աղբ է: «Հայաստանի ազգային վիճակագրական ծառայությունը աղբ է, այնտեղից ոնց կարելի է թիվ հանել»,- ասաց նա:

Ըստ Վարդանյանի՝ Փաշինյանն ուրիշ թվերի վրա է հիմնվում: «Ընդ որում, վարչապետն ավելի համեստ թիվ է ասում: «Ձեռնարկությունների ինկուբատոր հիմնադրամը» հետազոտություն է անցկացնում, որն էլի որոշակի մոտավորություն ունի, բայց ես կարծում եմ, որ իրական թիվը մեկ միլիարդի մոտ է»,- ասաց նա և ևս մեկ անգամ նշեց, որ վարչապետը զգույշ թիվ է ներկայացրել:

Մեր հարցին՝ ինչո՞ւ պետք է վարչապետն ավելի պակաս թիվ ներկայացներ, նա պատասխանեց. «Կարող է ես եմ ավել ներկայացնում, վարչապետը մի քիչ պակաս է ներկայացնում, դա զուտ գնահատականների խնդիր է»:

Կարեն Վարդանյանը հավելեց, որ «Ձեռնարկությունների ինկուբատոր» հիմնադրամը անում է տարեկան հաշվետվություն, հնարավոր է՝ վարչապետը ներկայացրել է այդ հիմնադրամի թիվը, որը եղել է անցած տարվանը: «Մենք ունենք 20 հազար աշխատող և մոտավոր գիտենք, որ նրանց արտադրողականությունը 45 հազար դոլարին մոտ է, այսինքն՝ դա տալիս է մոտավորապես 900 մլն-ի կարգի թիվը»,- նշեց Վարդանյանը:

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ