Քաղաքացին խնդրել է Անահիտ Ավանեսյանը լինի նրա բարերարը. Թագուհի Թովմասյան

«ՀՀ քաղաքացի Ս․ Պ․- ից ստացել եմ (21․01․2022) դիմում, որով քաղաքացին խնդրել է՝ միջոցներ ձեռնարկել, որպեսզի Առողջապահության նախարար Անահիտ Ավանեսյանը լինի նրա բարերարը՝ հրապարակային առաջարկի համաձայն:

Քաղաքացին ինձ ուղղված դիմումում տեղեկացրել է, որ դիմում է ուղարկել նաև ՀՀ առողջապահության նախարարին՝ խնդրելով լինել իր բարերարը, քանի որ իր բարեկամներից և ոչ մեկը չի ցանկացել կրել իր ՊՇՌ հետազոտության վճարի ֆինանսական բեռը։

Հաշվի առնելով ՀՀ առողջապահության նախարար Անահիտ Ավանեսյանի 30․12․2021 թվականի մամլո ասուլիսում արված հայտարարությունն այն մասին, որ «․․․ այո, Սահմանադրական դատարանը «իր հաշվին» բառակապակցությունը ճանաչել է հակասահմանադրական, այն դուրս կգա, քանի որ չեն կարող սահամանափակել, որ քաղաքացին հենց իր հաշվին կատարի վճարը, և ոչ թե ասենք ինչ-որ բարեկամի, բարերարի կամ որևէ այլ անձի հաշվին, ով ցանկություն ունի իր փոխարեն վճարել թեստի համար, ու քանի որ նման սահմանափակում չեն կարող մտցնել, ինչը, կարծում եմ, իրավաչափ է, այո, քաղաքացու փոխարեն կարող է նաև նրա բարեկամը վճարել թեստի համար․․․», ՀՀ առողջապահության նախարար Անահիտ Ավանեսյանին հրապարակային հորդորում եմ իրագործել իր իսկ առաջարկը, բավարարել ՀՀ քաղաքացի Ս․ Պ․ - ի խնդրանքն ու բարերարության սկզբունքով անձամբ կրել քաղաքացու՝ 7 օրը մեկ կատարվելիք ՊՇՌ հետազոտության վճարի ֆինանսական բեռը՝ հաշվի առնելով նաև թեստերի գնային քաղաքականությունը (մոտ 15000 դրամ) ու ՀՀ-ում սահմանված նվազագույն աշխատավարձի չափը (68000 ՀՀ դրամ),  ինչպես նաեւ կարևորելով սեփականության իրավունքի ճանաչման և պաշտպանության պետության հիմնարար պարտականությունն ու իրեն սոցիալական հռչակած պետության ներսում անձի՝ իր ողջամիտ սպասելիքների և պահանջմունքների բավարարման առումով պետության հոգածությունը մշտապես զգալու անհրաժեշտությունը»։