Դատարանների վերաբերյալ իրենց արտահայտած կարծիքներում լինել զուսպ և կոռեկտ. ԲԴԽ-ն՝ պատգամավորներին

ՀՀ Բարձրագույն դատական խորհուրդը խիստ կարեւորում է պետական իշխանության համակարգում դատական իշխանության՝ ապաքաղաքական, չեզոք եւ միայն մասնագիտական տիրույթում գործելու սահմանադրական առաքելությունը: Այս մասին հայտարարություն է տարածել Բարձրագույն դատական խորհուրդը։

«ՀՀ Բարձրագույն դատական խորհուրդը խիստ կարեւորում է պետական իշխանության համակարգում դատական իշխանության՝ ապաքաղաքական, չեզոք եւ միայն մասնագիտական տիրույթում գործելու սահմանադրական առաքելությունը:

Պետական իշխանության թեւերի բաժանման ու հավասարակշռման սահմանադրական սկզբունքի վրա ձեւավորված օրենսդիր, գործադիր եւ դատական մարմինների համագործակցությունը կարող է արդյունավետ գործել միայն այդ մարմինների ու պաշտոնատար անձանց փոխադարձ հարգանքի ու փոխըմբռնման պարագայում:

Եվրոպական դատավորների խորհրդատվական խորհրդի թիվ 18 (2015) եզրակացության համաձայն, քաղաքական գործիչների կողմից անհավասարակշիռ քննադատական մեկնաբանությունը կարող է խաթարել հանրային վստահությունը դատական իշխանության նկատմամբ:

Նկատի ունենալով, որ ութերորդ գումարման ՀՀ ԱԺ-ը նոր է կազմավորվել, ԱԺ բոլոր խմբակցություններին ու պատգամավորներին հորդորում ենք դատական իշխանության եւ դատարանների վերաբերյալ իրենց արտահայտած կարծիքներում եւ դիրքորոշումներում լինել առավելագույնս զուսպ եւ կոռեկտ»,- նշվում է հայտարարության մեջ։