Այս ամենի համար այդ անձնավորությունը պետք է պատասխան տա. Ռոբերտ Քոչարյան

ՀՀ երկրորդ նախագահ, «Հայաստան» դաշինքը գլխավորող Ռոբերտ Քոչարյանը և «Վերածնվող Հայաստան» կուսակցության նախագահ Վահե Հակոբյանը մայիսի 31-ին Գյումրիում հանդիպել են Շիրակի մարզի բնակիչների և շտաբերի աշխատակիցների հետ։ 

Քաղաքացիների հարցերը վերաբերել են Գյումրիում դեռևս տնակների առկայությանը, կորոնավիրուսի տնտեսական հետևանքներին, անվտանգային խնդիրներին, ընտրություններին մասնակցությանն ու կապիտուլյացիայի համար պատասխանատվությանը և այլ հարցերի։

Ռոբերտ Քոչարյանը շնորհակալություն է հայտնել հանդիպման մասնակիցներին՝ շտաբային աշխատանքներում ներգրավելու համար։ Նա վստահեցրել է, որ՝ ««Հայաստան» դաշինքի նախընտրական շտաբերը շատ ավելի ուժեղ են և մի քանի գլուխ բարձր են լինելու իշխանական շտաբերից՝ մտավոր, կազմակերպչական և համարձակության առումով»։  

Վահե Հակոբյանը նշել է, որ դաշինքի նախընտրական ծրագրում առանձնահատուկ ուշադրություն  է տրվում  Գյումրիին և, առհասարակ Շիրակին՝ թե՛ օդանավակայանի հարցով, թե՛ բիզնես հարցերով։ «Բայց հիմա մեր գերխնդիրն է լինելու պարզապես չթողնել, որ ներկա ապաշնորհ իշխանությունը նորից, ընտրությունների միջոցով, մտնի խորհրդարան», - նշել է նա:

Հրապարակում ենք հանդիպման տեսագրությունը։