«Թովմասյան» հիմնադրամի շնորհիվ բոլոր զորակոչիկները կկարողանան թեստավորվել

Հակահամաճարակային պայքարի շրջանակում «Թովմասյան» բարեգործական հիմնադրամը մեծաքանակ թեստեր և նմուշառման պարագաներ է նվիրաբերել ՀՀ զինված ուժերին, որոնցով 2020 թվականի ամառային զորակոչին ենթակա բոլոր ՀՀ քաղաքացիները կթեստավորվեն։

ՀՀ ՊՆ մամուլի ծառայության տեղեկացմամբ, հունիսի 17-ին նվիրաբերված պարագաները փոխանցվել են ՀՀ ԶՈւ ռազմաբժշկական ծառայությանը:

Զորակոչիկները թեստավորվելու են կորոնավիրուսային վարակի իմունոֆերմենտային եղանակով ախտորոշման միջոցով, որի նպատակը իմունոգլոբուլինների (հակամարմինների) հայտնաբերումն է։ Ախտորոշման գործընթաց է տևում է մոտ մեկ ժամ։

ՀՀ պաշտպանության նախարարի տեղակալ Գաբրիել Բալայանն իր խոսքում կարևորել է հիմնադրամի աջակցությունը հատկապես ամառային զորակոչի նախաշեմին։ Օրեր անց կմեկնարկի զինված ուժերի համալրման հերթական գործընթացը, որն այս տարի իրականացվելու է արտակարգ պայմաններում և զինակոչիկները վիճակահանությանը մասնակցելու են նմուշառում անցնելուց հետո։ «Թովմասյան» բարեգործական հիմնադրամի հատկացրած հազարավոր թեստերը կօգտագործվեն զինակոչիկների հետազոտման և առողջ զորակոչի ապահովման նպատակով։

«Թովմասյան» բարեգործական հիմնադրամի հոգաբարձուների խորհրդի նախագահ Արտակ Թովմասյանն իր հերթին արձանագրել է, որ անցած ամիսների ընթացքում հիմնադրամն իր նախաձեռնության շրջանակում կարողացել է օգնություն ցուցաբերել մի շարք հաստատությունների՝ Գյումրու, Վանաձորի ինֆեկցիոն հիվանդանոցներին, Նորք Ինֆեկցիոն հիվանդանոցին: Թովմասյանն ընդգծում է, որ շարունակելու են պայքարել համավարակի դեմ:

«Միասին Մենք Կարող ենք» աննախադեպ ու իր ձևաչափով բացառիկ նախաձեռնությունը սկիզբ առավ մայիսի 2-ին ու ընդամենը մեկ ամսվա ընթացքում նախագծի սահմանները ներառեցին բոլոր մայրցամաքները, նախաձեռնությանը միացան 120ից ավելի հայ և միջազգային մշակույթի գործիչներ:
Նախաձեռնությունը դեռ շարունակվում է, մանրամասները՝

www.tovmasyanfoundation.com կայքում: