Քաղաքապետարանը 100 մլն դրամ էր հատկացրել սրանք վերացնելու համար

«Ճանապարհի մակերևույթից ցածր կամ բարձր նիշի վրա գտնվող դիտահորերը այսօր երթևեկության համար խոչընդոտ են դառնում՝ երբեմն վթարային վիճակ ստեղծելով կամ վնասելով մեքենաները: Դրանք հիմա՝ ճանապարհների վերանորոգման ընթացքում կհավասարեցվեն ասֆալտի մակերեւույթին»,- ֆեյսբուքյան էջում մարտի 20-ին գրել էր Երևանի քաղաքապետի խոսնակ Հակոբ Կարապետյանը։

100 միլիոն դրամ է հատկացվել Երևանի 2020-ի բյուջեում՝ դիտահորերի, դրանց թուջե կափարիչների և անձրևորսիչների վերանորոգմանը: Խոսնակը նշել էր, որ ասֆալտապատման աշխատանքների ընթացքում այս տարի առանձին ուշադրության կարժանանան ճանապարհի վրա անհարթություն առաջացնող դիտահորերը: Այս ընթացքում Երևանի մի շարք փողոցներում ասֆալատապատում է իրականացվել, սակայն դիտահորորը, նախկինի պես, ճանապարհի մակերևույթից ցածր են կամ բարձր, և վարորդները շարունակում են մի կերպ շրջանցել դրանք կամ ուղղակի վնասել ավտոմեքենան։

Տեսանյութում Աթենքի փողոցն է, որտեղ ասֆալտապատում է իրականացվել ընդամենը մեկ շաբաթ առաջ։ Իհարկե՝ կարող են քաղաքապետարանի մասնագետները քանոնն առած չափել, թե որ դիտահորը որքան է բարձր ու ցածր ու սկսեն արձագանքել, սակայն դրանից իրականությունը չի փոխվի։ Իրականությունն այն է, որ դիտահորերին ձեռք չեն տվել։