ՌԴ քաղաքացիություն ստանալն այսուհետ ավելի հեշտ կլինի․ նոր օրենք

ՌԴ նախագահ Վլադիմիր Պուտինը ռուսական քաղաքացիություն ստանալու ընթացակարգը հեշտացնելու մասին դաշնային օրենք է ստորագրել։ Այս մասին հայտնում է РИА Новости-ն։

Դա վերաբերում է արտասահմանցիներին և քաղաքացիություն չունեցող անձանց, ովքեր ապրում են Ռուսաստանում։ Այժմ ռուսական քաղաքացիություն ստանալու համար պարտադիր չէ հրաժարվել այլ երկրի քաղաքացիությունից։

Նաև այն մարդկանց համար, ովքեր ծնվել են ԽՍՀՄ-ում և ապրել են ԽՍՀՄ նախկին հանրապետություններում, սակայն քաղաքացիություն չեն ստացել, հանվում են մինչ քաղաքացիություն ստանալու հայտ ներկայացնելը Ռուսաստանում երեք տարի ապրելու և օրինական եկամուտը հաստատելու պարտադիր պահանջները։ Այս նորման կտարածվի նաև ՌԴ քաղաքացիների արտասահմանցի կողակիցների համար, ովքեր ապրում են Ռուսաստանում և երեխաներ ունեն, ինչպես նաև այն արտասահմանցիների, ում ծնողներից մեկն ունի ռուսական քաղաքացիություն և ապրում է Ռուսաստանում։

Մոլդովայի, Ուկրաինայի, Բելառուսի և Ղազախստանի քաղաքացիները, ովքեր բնակության թույլտվություն ունեն Ռուսաստանում, կարող են հայտ ներկայացնել քաղաքացիություն ստանալու՝ առանց երկրում ապրլու ժամկետները պահպանելու։

Ռուսական բուհերի շրջանավարտների համար աշխատանքային գործունեության ժամկետը կրճատվում է մինչև մեկ տարի։