Ունենք կորոնավիրուսի 194 դեպք. Նիկոլ Փաշինյան

Այս պահի դրությամբ ունենք կորոնավիրուսի 194 դեպք։ Այս  մասին ֆեյսբուքյան լայվով հայտնեց ՀՀ վարչապետ Նիկոլ Փաշինյանը, ով ֆեյսբուքյան լայվով ներկայացնում է կորոնավիրուսի դեմ պայքարի ռազմավարությունը:

«Մեզ ամենահետաքրքրող հարցը այս պահին թե ինչպիսի ազդեցություն է ունենում տաք եղանակը կորոնավիրուսի վրա:Դեպքերի ավելի քան 70-75 տոկոսը ճյուղավորված են այսպես ասած Էջմիածնի եւ արտադրամասի դեպքերից: Կարող ենք ասել, որ Էջմիածնի ճյուղի զարգացումը կարողացել ենք կանգնացնել, հիմա աշխատում ենք կանգնեցնել արտադրամասի ճյուղի զարգացումը»,-ասաց նա:

Անդրադառնալով հիվանդների վիճակին`Փաշինյանը ասաց, որ հաստատված դեպքերի 78 տոկոսը ընդհանրապես չունի ջերմություն, 37-38 աստիճան ջերմություն ունեն  18 տոկոսը եւ 38-39 աստիճան ջերմություն ունեն 3 տոկոսը եւ 39-ից բարձր ջերմություն ունի հիվանդներից ընդամենը 1 տոկոսը:

Վարչապետը նշեց․ «Մեր մեծագույն խնդիրը ոչ միայն և ոչ այնքան կորոնավիրուսի տարածումը կանխելն է, որքան ապահովելը, որ դրա արդյունքում մենք չունենանք մահեր կամ ունենանք նվազագույն մահեր։ 

Նրա խոսքով` կառավարության որոշումները բաժանված են երկու ուղղության.

1. Կորոնավիրուսի տարածման կանխարգելում

2. Տնտեսական իրադրություն

«Մենք որոշել ենք, որ պետք է լայն աջակցություն ցուցաբերենք մեր տնտեսությանը և տնտեսվարողներին։ Մենք արդեն պատրաստում ենք փաթեթը, որպեսզի արտոնյալ վարկեր տրամադրենք այն ընկերություններին, որոնք կունենան աջակցության կարիք իրենց աշխատողներին աշխատավարձեր վճարելու, իրենց հարկային պարտավորությունները կատարելու, հումք ներկրելու, արտադրությունը կազմակերպելու և ռազմավարական ներդրումներ անելու համար։

Բանկերը կարող են այնքան էլ հակված չլինել այս ծրագրերի շրջանակում լայնորեն վարկավորել գյուղացիներին։ Մենք որոշել ենք, որ կառավարությունը պետք է որոշակի մասնակցություն ունենա։  Անհատների համար, որոնք կզբաղվեն մեր առաջարկած գյուղացիական ռազմավարական ծրագրերով, կառավարությունը նախ կզրոյացնի տոկոսները և կունենա ֆինանսավորման մասնակցություն անհատների պարագայում մինչև 30 տոկոս։ Մենք ենթադրում ենք, որ այս ծրագրերով շատ հեշտությամբ վարկեր կստանան բոլոր այն քաղաքացիները, որոնք ունեն լավ վարկային պատմություն։ Իսկ ի՞նչ պետք է անեն այն գյուղացիները և ֆերմերները, որոնց վարկային պատմությունն այնքան էլ լավը չէ։ Բոլոր այն դեպքերում, երբ հնարավորություն չկա անհատապես ստանալու այսպիսի վարկային միջոցներ, մենք առաջարկում ենք, որ մեր հայրենակիցները համայնքներում ձևավորեն գյուղացիական կոոպերատիվներ, և այդ պարագայում կառավարությունը այս ծրագրերին մասնակցություն կունենա 50-60, հնարավոր է՝ նույնսիկ 70 տոկոսով»,- ասաց նա։

Վարչապետը նշեց, որ նաեւ աջակցություն կտրամադրվի այն քաղաքացիներին, որոնք կորոնավիրուսի հետեւանքով կդառնան գործազուրկ:

Խնդրում եմ մեր հայրենակիցներին Ռուսաստանից Հայաստան ուղեւորվելիս օգտվել միայն օդային տրանսպորտից:Այս  մասին ֆեյսբուքյան լայվով ասաց ՀՀ վարչապետ Նիկոլ Փաշինյանը, ով ներկայացնում է կորոնավիրուսի դեմ պայքարի ռազմավարությունը:

«Այս անգամ որպես բացառություն մենք խնդրեցինք, նրանք բացեցին ճանապարհը, բայց պետք է հարգենք միմյանց կանոնները եւ խնդրում եմ մեր հայրենակիցներին Ռուսաստանից Հայաստան ուղեւորվելիս օգտվել միայն օդային տրանսպորտից: Բայց Վերին լարսը բաց է բեռնափոխադրումների համար եւ բեռնափոխադրումներ կատարվելու են»,- ասաց նա:

Փաշինյանը հավելեց, որ չկա եւ չի լինելու երկիր, որը կարողանա խուսափել կորոնավիրուսի վարակից: