Ամենազայրացած երկիրը` սիրո և հանդուրժողականության մթնոլորտում

Ողջ աշխարհում մարդիկ գնալով ավելի չար են դառնում և ապրում են մշտական սթրեսների մեջ։ Հատկապես դա նկատելի է Հայատանում և Հունաստանում: Այս մասին գրում է france24 -ը՝  հղում անելով հեղինակավոր «Գելլափ» կազմակերպության հարցումների արդյունքում ձևավորված «Global Emotions» զեկույցին: Հարցումն արվել է 2018 թվականին:

Ավելի քան 140 երկրների 151 հազար բնակչության տրվել են միևնույն 10-ական հարցերը դրական ու բացասական հույզերի մասին, որոնք նրանք ապրել են նախորդ օրը:

Հարցեր դրական էմոցիաների մասին

• Ձեզ երեկ հարգանքով վերաբերվե՞լ են,
• Դուք ժպտացե՞լ եք կամ շատ ծիծաղե՞լ եք,
• Դուք սովորել կամ արե՞լ եք որևէ հետաքրքիր բան,
• Հաճույք զգացե՞լ եք նախորդ օրվա ընթացքում,
• Հանգստություն զգացե՞լ եք

Հարցեր բացասական էմոցիաների մասին

• Ֆիզիկական ցավ զգացե՞լ եք,
• Անհանգստություն ապրե՞լ եք,
• Տխրություն զգացե՞լ եք,
• Սթրես տարե՞լ եք,
• Զայրույթ ապրե՞լ եք․

Ողջ աշխարհում հարցվածների միջինը 71 տոկոսը հայտնել է, որ նախորդ օրը հաճույք է ապրել 72% տոկոսը հայտնել է, որ իրեն չափազանց հանգիստ է զգացել, 74%-ը հայտնել է, որ ժպտացել ու ծիծաղել է, իսկ 87%-ը հայտնել է, որ իրեն հարգանքով են վերաբերել:

Բացասական հույզերի հաշվեկշիռը ռեկորդ է գրանցել՝ 30 բալ, որն ամենաբարձրն է 2006 թվականից ի վեր:

Աֆրիկյան պետությունները հավաքել են բացասական հույզերի ամենաշատ միավորները. Ցանկը գլխավորում է Չադը՝ 54 միավորով: Նրան հետևում են Նիգերիան և Սիերա-Լիոնեն՝ 50-ական միավորով:

Համաձայն Գելլափի, չնայած Չադն աշխարհի ամենաբացասական հույզերով երկիրն է, նրա բնակչությունը նաև իրեն զգում է ամենատխուրն ու տառապյալը ողջ աշխարհում: Սա պայմանավորված է բռնությամբ, տեղահանումով և այլնով, որին ենթարկվում են հազարավոր ընտանիքներ: Զեկույցում նշվում է, որ հակամարտող գոտիներում, հասկանալի պատճառներով, շատ բարձր են գնահատվում բացասական հույզերը:

Իսկ հիմա մեզ ամենահետաքրքրողը․ Ամենաջղային ժողովուրդը, պարզվում է, հայերն են. Հարցումների արդյունքում նրանք հավաքել են ամենաբարձր միավորը՝ 45 տոկոս։ Հարցման մասնակիցների այդքան մասը նախորդ օրը զայրացել է: Հայերիս հաջորդում են իրաքցիները, մեր հարևան իրանցիները, պաղեստինցիները և մարոկկացիները: Վեցերորդ հորիզոնականում մեր մյուս հարևանն է՝ Թուրքիան: Նա բացասական արդյունքով մեզ զիջում է 5 միավորով:

Սթրեսի առումով ևս համաշխարհային միջին ցուցանիշը հասել է առավելագույնին: Վերջին երեք տարիներին այս առումով անգերազանցելի են հույները՝ 59 միավոր:

Այս ցուցակում կան նաև մեր երկու հարևանները՝ Թուրքիան և Իրանը՝ համապատասխանաբար 5 և 11-րդ տեղերում:

Այս ցուցանիշներn այդքան ուշադրության արժանի չէին լինի, եթե վերջին մեկ տարին մեր իշխանություններն ամեն առիթով մեզ չհամոզեին, թե այլևս ապրում ենք սիրո և հանդուրժողականության մթնոլորտում։