Մայրաքաղաքում նստած ենք «վառոդի տակառի» վրա․ ԱԻ նախարար

Ապրիլի 12-ին ՀՀ Արտակարգ իրավիճակների նախարար Ֆելիքս Ցոլակյանի նախագահությամբ անցկացվել է փրկարար ծառայության ամենշաբաթյա ընդլայնված խորհրդակցություն: Այս մասին հայտնում են նախարարության լրատվական ծառայությունից:

ԱԻՆ ՓԾ տարբեր ստորաբաժանումների ղեկավարները, Երևանի ու մարզային փրկարարական վարչության (ՄՓՎ) պետերը զեկուցել են ապրիլի 5-12-ն ընկած ժամանակահատվածում գրանցված ահազանգերի, ձեռնարկված միջոցառումների, մարզերում տեղակայված ժամանակավոր հենակետերի, տրանսպորտային միջոցների տեխնիկական վիճակի, ճանապարհների անցանելիության, տրանսպորտային միջոցների արգելափակման, փրկարարական և այլ աշխատանքների մասին:

Հնչեցված զեկույցներից հետո նախարար Ֆելիքս Ցոլակյանը տվել է մի շարք հանձնարարականներ, որոնք վերաբերում են ՀՓՋ-ներում առկա գույքային և շենքային պայմաններին, անձնակազմի հետ աշխատանքին և կարգապահության ապահովմանը: Նախարարը նախանշել է մայրաքաղաքում և յուրաքանչյուր մարզային վարչությունում առկա խնդիրները, ինչպես նաև աշխարհագրական դիրքի, եղանակային պայմանների, տնտեսական և արդյունաբերական զարգացման առանձնահատկություններով պայմանավորված՝ աշխատանքային առաջնահերթությունները:

Ֆելիքս Ցոլակյանն անդրադարձել է մարզերում հենակետերի բաշխվածությանը, ՓԾ ստորաբաժանումների պատշաճ պատրաստությանը, անձնակազմի աշխատանքի արդյունավետության բարձրացմանը և կարգադրեց հնչեցված մտահոգություններին տալ առարկայական լուծումներ:

Նախարարը մտահոգություն է հայտնել Երևանի ՀՓՋ-ների տեխնիկական ապահովվածության հարցով և նշել, որ սպասվող օժանդակության ժամանակ ջոկատները կհամալրվեն անհրաժեշտ տեխնիկայով:

«Երևանում այսօր առկա են լրջագույն խնդիրներ: Մենք փաստացի մայրաքաղաքում նստած ենք «վառոդի տակառի» վրա: Այստեղ են տեղակայված քիմիական արդյունաբերության և այլ հնարավոր աղետածին գործունեություն իրականացնող ձեռնարկություններ»,- նշել է Ֆելիքս Ցոլակյանը:

Նախարարը ներկաների ուշադրությունն է հրավիրել նաև բազմաբնակարան շենքերի անվտանգության հետ կապված խնդիրներին:

«Հարցն ամենևին շենքերի վերին հարկեր հասանելիություն ապահովող տեխնիկայի առկայությունը չէ: Աշխարհում կան 100-200 հարկանի շենքեր և այս կառույցներում անվտանգության ապահովման միակ լուծումը՝ շինարարության ընթացքում անվտանգության հետ կապված խնդիրների բացառումն է և հակահրդեհային համակարգերի առկայությունը»,- ասել է Ֆելիքս Ցոլակյանը:

Բացի այդ, ըստ Ֆելիքս Ցոլակյանի, առկա է շենքերին տեխնիկա մոտեցնելու խնդիրը:

«Մայրաքաղաքի կենտրոնում միմյանց չափազանց մոտ կառուցված են շենքեր, և անհրաժեշտության պարագայում, հրշեջ մեքենան ուղղակի չի կարող մոտենալ նրանցից որևէ մեկին»,- նշել է Ֆելիքս Ցոլակյանը:

Առանձնահատուկ խնդիր է նաև խցանումները, և առավել ծանրաբեռնված ժամերին մարտական հաշվարկն առևույթ մոտակայքում գտնվող դեպքի վայր կարող է հասնել միայն տևական ժամանակ հետո:

Անդրադառնալով փրկարարների աշխատանքին՝ մասնավորապես, արհեստավարժության ապահովմանը, նախարարը հանձնարարել է, որ առկա խնդիրների վերաբերյալ վերլուծությունները, նախանշված լուծումներով, ինչպես նաև հանձնարարականներով, հասցվեն բոլոր ստորաբաժանումներին:

Նախարարը մտահոգություն է հայտնել նաև հանրային մարդաշատ վայրերում անվտանգության ապահովման վերաբերյալ:

«Ներկա պահին մայրաքաղաքի հանրային մարդաշատ օբյեկտներում աղետի դեպքում իրական գործող և աշխատող տարհանման մեխանիզմ գոյություն չունի: Շատ հնարավոր է, որ ինչ-որ մի տեղ առկա է գեղեցիկ և մանրակրկիտ տարհանման պլան, սակայն ցավոք այն միայն թղթի վրա է»,- ասել է նախարարը:

Խորհրդակցության ընթացքում նախարար Ֆելիքս Ցոլակյանը խոսել է նաև սպասվող կառուցվածքային փոփոխությունների մասին, շեշտելով, որ դրանք միտված են լինելու ծառայությունների աշխատանքի արդյունավետության բարձրացմանը:

ԱԻՆ-ը, ըստ նախարարի, որպես զարգացման ուղենիշ պետք է գնա ոչ թե հետևանքի վերացման, այլ դեպքերի կանխարգելման ճանապարհով:

«Շատ կարևոր տեղ է տրվելու դեպքերի կանխարգելմանը: Այս գործում շատ կարևոր դերակատարում ունեն քաղպաշտպանության և բնակպաշտպանության վարչությունները»,- ասել է Ֆելիքս Ցոլակյանը:

Ըստ նախարարի՝ այս խնդրի իրականացման ճանապարհին ԱԻՆ աշխատակիցների գլխավոր զենքը նախաձեռնողականությունն է և որպես արդյունք՝ հայտնաբերված թերությունների մասին ահազանգն ու բարձրաձայնումը:

Նախարարը, հղում կատարելով, փրկարար ծառայության մասին օրենքին, նշել է, որ կառույցի աշխատակիցները իրավասու են մտնել ցանկացած հաստատություն և պահանջել անվտանգության ապահովման բոլոր փաստաթղթերը, դիտարկել առկա թերությունները:

Ըստ նախարարի՝ ԱԻՆ-ը պարտավոր է հայտնաբերել և բարձրաձայնել ոլորտում առկա բոլոր խնդիրները:

«Դա կլինի, թերևս, մեր ամենամեծ և ամենակարևոր գործը»,- ասել է Ֆելիքս Ցոլակյանը:

Նախարարը կարգադրել է նաև տարածքային փրկարար վարչությունների ղեկավարներին ակտիվորեն համագործակցել տեղական իշխանությունների հետ, մասնավորապես, գույքային և շենքային պայմանների բարելավման հարցերով՝ վստահություն հայտնելով, որ այս համագործակցությունը կտա ցանկալի արդյունք:

Նախարարն ընդգծել է կառույցներում կարգ ու կանոնի խստագույնս պահպանումը և շեշտեց, որ թերությունների հայտնաբերման դեպքում կարող են լինել կադրային լուծումներ: