Սրիկայությունն ու անբարոյականությունն էլ սահման պիտի ունենան․ փոխվարչապետ

Քանի ամիս է՝ փորձում եմ հնարավորինս անտեսել իմ և իմ ընտանիքի մասին «մամուլով» պարբերաբար տարածվող էժանագին զրպարտությունները և հերյուրանքները՝ մտածելով, թե սրիկայությունն ու անբարոյականությունն էլ, ի վերջո, սահման պիտի ունենան։ Փաստորեն անհիմն լավատես էի։ Այս մասին ֆեյսբուքյան իր էջում գրել է ՀՀ առաջին փոխվարչապետ Արարատ Միրզոյանը։

Նշենք, որ կայքերում և սոցցանցերում տեղեկություն էր շրջանառվում, որ Արարատ Միրզոյանի մայրը սննդային սև խավիարից թունավորում է ստացել և տեղափոխվել է հիվանդանոց, իսկ հիվանդանոցի շենքը շրջապատվել է պետական բազմաթիվ ավտոմեքենաներով։

Այս առնչությամբ փոխվարչապետը գրում է. 

«Նախ՝ մայրս թունավորվել է սովորական աջիկայից, ոչ թե սև խավիարից։ Երկրորդ՝ միակ պետական մեքենան, որը այդ առիթով հայտնվել է այդ հիվանդանոցի մոտ, եղել է իմ ծառայողականը. երկու անգամ ընդմիջմանս ընթացքում, մեկ անգամ էլ աշխատանքից հետո այցելել եմ մորս։ Հուսամ՝ սենց դեպքերի համար անթույլատրելի ճոխություն չեք համարի։ Ավելորդ է ասել, որ որևէ ճնշում որևէ բժշկի նկատմամբ չի գործադրվել։ Չէ, դատական հայց չեմ ներկայացնելու։ Ժամանակ չունեմ։ Համ էլ՝ ազատ մնացեք, նույնիսկ սրիկայության ու անբարոյականության մեջ։ Առողջություն ձեր ընտանիքներին։

Հ.Գ. Մայրս լավ է, արդեն տանն է»։