Մարալիկում պահանջում են քաղաքապետի հրաժարականը

Մարալիկի ՀՀԿ-ական քաղաքապետի հրաժարականը պահանջող մարալիկցիները վաղ առավոտից փակել են քաղաքապետարանի մուտքերը, և քաղաքապետարանի աշխատակազմը չի  կարողանում մուտք գործել շենք, այդ թվում՝ քաղաքապետ Արտակ Գևորգյանը:

«Առավոտյան մոտ 15-20 հոգի, ովքեր ամիսներ շարունակ փորձում են քայլեր ձեռնարկել՝ իրենց անձնական ցանկություններից ու ամիբիցիաներից ելնելով, փակել են համայնքապետարանի դուռը և չի կարգավորվում համայնքապետարանի բնականոն աշխատանքը»,-նշել է Արտակ Գևորգյանը՝ հավելելով, որ ակտիվիստները հավակնում են Անի համայնքի ղեկավարի պաշտոնին, իսկ դա ընտրովի պաշտոն է և ժողովրդի կողմից է ընտրվել։ «Անի խոշորացված համայնքի բնակչությունը միշտ մեր կողքին է եղել։ Նրանք, անճարությունից ելնելով, փորձում են դիմել նման գործողությունների՝ խոչընդոտելով Անի համայնքապետարանի գործունեությունը։ Մենք չենք ուզում՝ բախումներ լինեն»,- հավելել է քաղաքապետը։

Մարալիկի քաղաքապետն ահազանգել է ոստիկանություն։ Ոստիկանության աշխատակիցները հաղորդել են, որ տարվում են բանակցություններ, կփորձեն արագ ապահովել ՏԻՄ աշխատակիցների մուտքը։