Վրաստանում պետծառայողներին արգելվել է սև գույնի մեքենաներով երթևեկել

Վրաստանի իշխանությունների որոշմամբ՝ պետծառայողների համար նախատեսված մեքենաները, անկախ դասից, կարող են սևից բացի ցանկացած գույնի լինել: Ինչպես նշում է newsgeorgia.ge կայքը, «Պետական ավտոպարկիի վերաբաշխման հաստատման, ծառայողական ավտոմեքենայի դասակարգման և գնման կամ փոխարինման կանոնների մասին» կառավարության որոշմամբ, մինչ ընթացիկ տարվա ապրիլի 25-ը բոլոր նախարարություններն ու պետական հաստատությունները պետք է ներկայացնեն ավտոպարկի օպտիմալացման նախագիծ:

Պետծառայողների համար խորհուրդ է տրվում գնել մեքենաներ, որոնք 100 կմ անցնելու համար 6 լ բենզինից ավելի վառելիք չեն ծախսում:

Ծառայողական սև մեքենաներից հրաժարվելու առաջարկով է հանդես եկել երկրի վարչապետ Գեորգի Կվիրիկաշվիլին՝ կոչ անելով կառավարության անդամներին անցյալում թողնել «սև ջիփերի դարաշրջանն» ու նախապատվությունը տալ այլ երանգների մեքենաներին:

Սև մեքենաների օգտագործման արգելք է սահմանվել նաև Թուրքմենստանում: